Mipham Rinpoche Guru Yoga—Tibetan
༄༅། །ཀུན་གཟིགས་མ་ཧཱ་པཎྜི་ཏ་མི་ཕམ་འཇམ་པའི་དབྱངས་ཀྱི་བླ་མའི་རྣལ་འབྱོར་ཡེ་ཤེས་སྣང་བ་རྒྱས་པ་ཞེས་བྱ་བ་བཞུགས་སོ། །
ན་མོ་མཉྫུ་ཤྲཱི་གུ་ར་ཝེ།
དེ་ལ་ལམ་ཐམས་ཅད་ཀྱི་མཐར་ཐུག་ཟབ་མོ་བླ་མའི་རྣལ་འབྱོར་གྱིས་མཁྱེན་གཉིས་སྣང་བ་རྒྱས་པར་འདོད་པས་འདིར་འཇུག་པར་བྱ་སྟེ། དེ་ལའང་གསུམ། སྔོན་འགྲོ། དངོས་གཞི། རྗེས་སོ། །
དང་པོ་ལ་གཉིས།
སྐྱབས་སུ་འགྲོ་བ་ནི།
བདག་གཞན་ཡིད་ཅན་འགྲོ་བ་མཐའ་དག་ཀུན། །
དུས་འདི་ནས་བཟུང་བྱང་ཆུབ་མ་ཐོབ་བར། །
བླ་མ་མཆོག་དང་དཀོན་མཆོག་རིན་པོ་ཆེར། །
སྐྱབས་སུ་མཆིའོ་བདག་རྒྱུད་བྱིན་གྱིས་རློབས། །
ལན་གསུམ།
གཉིས་པ་སེམས་བསྐྱེད་ནི། །
བདག་གིས་མཁའ་མཉམ་འགྲོ་བའི་དོན་སླད་དུ། །
ལམ་གྱི་སྙིང་པོ་ཟབ་མོ་བླ་མ་ཡི། །
རྣལ་འབྱོར་མཆོག་ལ་རྟག་ཏུ་བརྩོན་བྱས་ནས། །
སྲིད་ཞིར་མི་གནས་གོ་འཕང་མཆོག་ཐོབ་བྱ། །
ལན་གསུམ།
གཉིས་པ་དངོས་གཞི་ལ་གསུམ་ལས།
དང་པོ་རྟེན་བསྐྱེད་པ་ནི།
གཟུང་འཛིན་ཆོས་ཀུན་མི་དམིགས་སྟོང་པའི་ངང་། །
མདུན་མཁར་སེང་ཁྲི་པདྨ་ཟླ་བའི་སྟེང་། །
མཁྱེན་པའི་གཏེར་ཆེན་མི་ཕམ་རྣམ་པར་རྒྱལ། །
དཀར་གསལ་ཞི་འཛུམ་ཕྱག་གཡས་ཆོས་འཆད་ཀྱི། །
ཕྱག་རྒྱས་ཨུཏྤལ་སྟེང་ན་རལ་གྲི་བསྣམས། །
གཡོན་པས་མཉམ་བཞག་མདོ་སྔགས་གླེགས་བམ་འཛིན། །
སྐུ་ལ་ཆོས་གོས་ཞབས་གཉིས་སྐྱིལ་མོ་ཀྲུང་། །
དབུ་ལ་པཎ་ཞུ་སྣེ་རིང་མཛེས་པར་གསོལ། །
རབ་འབྱམས་སྐྱབས་ཀུན་འདུས་པའི་སྐུར་གསལ་བའི། །
གནས་གསུམ་ཡིག་འབྲུ་གསུམ་གྱིས་མཚན་པར་གསལ། །
གཉིས་པ་ཚོགས་བསགས་པ་ནི།
སྐྱབས་གནས་ཀུན་འདུས་དཔལ་ལྡན་བླ་མ་ལ། །
ལུས་ངག་ཡིད་གསུམ་གུས་པས་ཕྱག་འཚལ་ལོ། །
ཕྱི་ནང་གསང་བའི་མཆོད་པའི་སྤྲིན་གྱིས་མཆོད། །
ཚེ་རབས་ཐོག་མེད་བསགས་པའི་སྡིག་ལྟུང་བཤགས། །
འཁོར་འདས་དགེ་བ་ཀུན་ལ་རྗེས་ཡི་རང་། །
ཆོས་ཀྱི་འཁོར་ལོ་བླ་མེད་བསྐོར་བར་བསྐུལ། །
ཇི་སྲིད་མྱ་ངན་མི་འདའ་བཞུགས་གསོལ་འདེབས། །
དགེ་ཚོགས་བླ་མེད་བྱང་ཆུབ་ཆེན་པོར་བསྔོ། །
བདག་གཞན་འགྲོ་ཀུན་སྲིད་ལས་རྣམ་གྲོལ་ཤོག །
རྒྱས་པར་སྤྲོ་ན་མཎྜལ་ཀྱང་ལན་གྲངས་ཅི་རིགས་པར་འབུལ།
གསུམ་པ་གསོལ་བ་འདེབས་པ་ནི།
མོས་གུས་ཤུགས་དྲག་ཏུ་བསྐྱེད་ལ།
རིག་སྟོང་འཇམ་དཔལ་གཞོན་ནུའི་བྱིན་རླབས་ལས། །
དགོངས་པའི་ཀློང་ནས་སྤོབས་པའི་གཏེར་བརྒྱད་གྲོལ། །
ལུང་རྟོགས་ཆོས་ཚུལ་རྒྱ་མཚོའི་མངའ་བདག་མཆོག །
ཨ་ཛཱི་ཏ་བི་ཛ་ཡ་ལ་གསོལ་བ་འདེབས། །
ཞེས་ལན་གྲངས་ཅི་ནུས་དང་། རྒྱས་པར་རྣམ་ཐར་བསྟོད་པ་དང་། གསོལ་འདེབས་མཁས་གྲུབ་ཆེན་པོ་རྣམས་ཀྱིས་མཛད་པའི་རིགས་རྣམས་འདོན།
ཐུགས་རྒྱུད་བསྐུལ་བའི་བཟླས་པ་ནི།
ཨོཾ་ཨཱཿཧཱུྃ་གུ་རུ་མཉྫུ་གྷོ་ཥ་ཨ་ཛཱི་ཏ་བི་ཛ་ཡ་སརྦ་སིདྡྷི་ཧཱུྃ།
ཞེས་པའང་བཟླའོ། །
ཤེས་རབ་འཕེལ་བའི་སླད་དུ་བཟླས་པ་བྱ་བར་སྤྲོ་ན།
བླ་མའི་ཐུགས་དབུས་འཁོར་ལོ་དཀར་པོ་ནི། །
རྩིབས་དྲུག་ལྟེ་བར་དྷཱིཿཡིག་དམར་སེར་དང་། །
རྩིབས་སྟེང་ཡིག་འབྲུ་རེ་རེས་མཚན་པ་ལས། །
འཁོར་ལོ་སྔགས་བཅས་དཔག་མེད་རབ་འཕྲོས་པ། །
བདག་གི་སྙིང་དབུས་ཐིམ་པས་སྡིག་སྒྲིབ་སྦྱོང་། །
རྨོངས་པའི་མུན་པ་མ་ལུས་སེལ་བར་གྱུར། །
ཨོཾ་ཨ་ར་པ་ཙ་ན་དྷཱིཿ
བརྒྱ་སྟོང་སོགས་བཟླའོ།
གསུམ་པ་རྗེས་ལ་གཉིས།
དང་པོ་དབང་བླང་ཞིང་རང་ལ་བསྟིམ་པ་ནི།
བླ་མའི་གནས་གསུམ་འོད་ཟེར་དཀར་དམར་མཐིང་། །
རིམ་དང་ཅིག་ཆར་བྱུང་ནས་སྒོ་གསུམ་ཐིམ། །
སྒྲིབ་པ་བཞི་དག་དབང་ཐོབ་སྐུ་བཞི་ཡི། །
ས་བོན་ཐེབས་ནས་བླ་མ་རང་ལ་ཐིམ། །
ཆོས་ཉིད་མ་བཅོས་དེ་བཞིན་ཉིད་ཀྱི་ངང་། །
རང་བབས་གནས་ལུགས་རང་ཞལ་བལྟ་བར་བྱ། །
ཞེས་ཅི་ནུས་སུ་མཉམ་པར་བཞག །
གཉིས་པ་ཐུན་ལས་ལྡང་བ་ནི།
དུས་འདི་ནས་བཟུང་བྱང་ཆུབ་སྙིང་པོའི་བར། །
བླ་མ་འཇམ་པའི་དབྱངས་ཀྱིས་རྗེས་སུ་བཟུང་། །
བཀའ་དང་བསྟན་བཅོས་ཀུན་ལ་མཚུངས་མེད་ཀྱི། །
བློ་གྲོས་སྤོབས་པའི་གཏེར་ཆེན་སྩལ་དུ་གསོལ། །
བདག་གི་སྒོ་གསུམ་བྱ་བ་ཅི་བགྱིས་པ། །
གཞན་ལ་ཕན་པ་འབའ་ཞིག་འགྱུར་བ་དང་། །
མཁྱེན་བརྩེ་ནུས་པ་མི་ཕམ་འཇམ་དབྱངས་ཀྱི། །
རྣམ་ཐར་ཡོངས་རྫོགས་མངོན་དུ་འགྱུར་བར་ཤོག །
ཅེས་དང་གཞན་ཡང་བསྔོ་སྨོན་གང་ཤེས་དང་། སྣང་གྲགས་རིག་གསུམ་བླ་མའི་ཁྱེར་སོ་གསུམ་དང་མི་འབྲལ་བར་བྱའོ། །
ཞེས་པའང་ཨ་ཛི་རོང་གི་གཟུར་ལྷ་འབུམ་སྤྲུལ་སྐུ་འཇམ་དབྱངས་བསྟན་འཛིན་བཟང་པོས་བསྐུལ་བ་བཞིན་ཆོས་ཀྱི་བློ་གྲོས་པས་ཀཿཐོག་རྡོ་རྗེ་གདན་དུ་བྲིས་པ་སིདྡྷི་རསྟུ། དགེའོ།། །།
