A Spontaneous Vajra Song—Tibetan

༄༅། །རྡོ་རྗེའི་ཐོལ་གླུ།

ཕ་བླ་མ་རྗེ་ལ་གུས་པས་འདུད།  །

བུ་ཉོན་དང་རིགས་ལྡན་ཡེ་ཤེས་སྒྲོན།  །

ངག་ཏུ་འཚོགས་གྲལ་ལྟ་བུར་འདོན་ཚེ་འདི་ནས་མགོ་བཟུང་ན་ལེགས།

འཁོར་འདས་སྟོང་ཆེན་གྱི་ཀོང་བུ་རུ།  །

ཀ་དག་ཡེ་ཤེས་ཀྱི་མར་མེ་སྦར།  །

ཆོས་ཉིད་རང་གསལ་གྱི་མཆོད་པ་འབུལ།  །

ཡེ་ཤེས་སྐུ་ལྔ་ཡི་དངོས་གྲུབ་སྩོལ།  །

རིག་པ་ཀ་དག་གི་ཀོང་བུ་རུ།  །

ལྷུན་གྲུབ་འོད་གསལ་གྱི་མར་མེ་སྦར།  །

བྱ་རྩོལ་བློ་བྲལ་གྱི་མཆོད་པ་འབུལ།  །

སྣང་བཞི་མཐར་ཕྱིན་གྱི་དངོས་གྲུབ་སྩོལ།  །

སྣང་བ་འོད་གསལ་གྱི་ཀོང་བུ་རུ།  །

སྐུ་དང་ཡེ་ཤེས་ཀྱི་མར་མེ་སྦར།  །

ཀ་དག་གཏིང་གསལ་གྱི་མཆོད་པ་འབུལ།  །

ཆོས་ཟད་ཆེན་པོ་ཡི་དངོས་གྲུབ་སྩོལ།  །

ཆོས་ཟད་བློ་འདས་ཀྱི་ཀོང་བུ་རུ།  །

སྐུ་གསུམ་དབྱེར་མེད་ཀྱི་མར་མེ་སྦར།  །

འཁོར་བ་དོང་སྤྲུགས་ཀྱི་མཆོད་པ་འབུལ།  །

གཞན་དོན་མཐར་ཕྱིན་གྱི་དངོས་གྲུབ་སྩོལ།  །

གྲགས་སྟོང་རྡོ་རྗེའི་ཐོལ་གླུ།  །

གང་ཤར་ཤུགས་འབྱུང་བརྗོད་འདིས།  །

གཉིས་སྣང་འཁྲུལ་པའི་སེམས་ཅན།  །

གཉིས་མེད་ཀློང་དུ་གྱུར་ཅིག།

བདེ་ཆེན་པདྨ་ཤེལ་ཕུག།  
འོད་གསལ་ཆེན་པོའི་ཁང་པར།  །
ཡེ་ཤེས་རིག་པའི་ཁྱེའུ་ཆུང་།  །
ཉམས་ཀྱི་སྣང་བ་འབར་བས།  །
རྡོ་རྗེའི་གླུ་འདི་སྒྲོགས་སོ།  །

དགེའོ།།   །།