Brief Tendrel Nyesel Fire Offering—Tibetan
༄༅། །རྟེན་འབྲེལ་ཉེས་སེལ་གྱི་ཆོ་ག་བསྡུས་པའི་སྦྱིན་བསྲེག་མི་མཐུན་ཀུན་ཞི་བཞུགས་སོ། །
ན་མོ་པདྨ་ཀཱ་རཱ་ཡཾ།
དེ་ལ་རྟེན་འབྲེལ་ཉེས་སེལ་གྱི་ཆོ་ག་བསྡུས་པ་དང་འབྲེལ་བའི་སྦྱིན་སྲེག་གཏེར་གཞུང་ལས་ཅུང་ཟད་རྒྱས་པར་སྤྲོ་བར་འདོད་ན། ཞི་རྒྱས་གང་རུང་གི་ཐབ་སྟེང་ཁར་ཐིག་ཆེན་བརྒྱད་བཏབ་པའི་ལྟེ་བར་ཆོས་འབྱུང་བསྣོལ་མ་དམར་པོའི་དབུས་སུ་ཧཱུྃ་དམར། དེ་རྒྱབ་འོད་ཕྲེང་གྲྭ་བཞིར་ཟླ་ཕྱེད་རྡོ་རྗེ་བྲིས་པ་དང་བུད་ཤིང་ཟླུམ་པོའམ་གྲུ་བཞིར་བརྩེགས། ཡམ་ཤིང་མར་ཁུ་བསྲེག་རྫས་སྣ་ཚོགས་དཔལ་འབར་རྣམས་འདུ་བྱས་ལ།
རཾ་ཡཾ་ཁཾ༔
མཆོད་རྫས་རྣམ་པ་ཐམས་ཅད་པ༔
ཟག་མེད་ཡེ་ཤེས་རང་བཞིན་གྱུར༔
ཨོཾ་ཨཱཿ་ཧཱུྃ༔
བདུན་ནམ་ལན་གསུམ་བརྗོད་པར་བྱ༔
མེ་ལྷ་མཆོད་པ་ནི། དཔལ་འབར་ལ་མེ་སྤོར་ལ།
ཛྭ་ལ་རཾ༔
ཞེས་གཡས་གཡས་བསྐོར་གྱི་ཤར་སྒོ་ནས་སྤར།
ཤར་ལྷོའི་བདག་པོའི་དྲང་སྲོང་མཆོག༔
སྤྱན་དྲངས་མེ་དང་དབྱེར་མེད་གྱུར༔
ཛ་ཧཱུྃ་བཾ་ཧོཿ
མེ་ལྷའི་ཞལ་ཧོམ་ཀློང་ཡངས་སུ༔
དམ་རྫས་བདུད་རྩིའི་སྦྱིན་སྲེག་འབུལ༔
ཐོག་མར་བྱོན་སྐྱེམས་མར་ཁུ།
ཨོཾ་ཨགྣེ་མེ་དེ་ཝ་ཤྲཱི་སརྦ་ཤིནྟཾ་པུཋྚིཾ་ཝ་ཤཾ་མ་ར་ཡ་ཧཱུྃ་སྭཱཧཱ༔
ཞེས་པའི་སྔགས་ཀྱི་དབུལ།
དེ་ནས་ཡཾ་ཤིང་མར་ཁུ་བསྲེག་རྫས་རྣམས་གྲངས་ཅི་ནུས་དབུལ།
མཚམས་རྣམས་སུ་འདོད་གསོལ་ནི།
ལྷ་རྣམས་མཆོད་དང་ཕྲིན་ལས་བཞི༔
མྱུར་དུ་འགྲུབ་པའི་གྲོགས་མཛོད་ཅིག༔
ཅེས་གདགས་འདས་པའི་མེ་ལྷ་མཆོད་པ་ནི།
མེ་ལྷ་ཡེ་ཤེས་མེ་འབར་ཀློང་༔
མ་ཧཱ་གུ་རུ་པདྨ་འབྱུང་༔
སྣང་སྲིད་ཟིལ་གནོན་རང་སྣང་ལྷ༔
སྒྱུ་འཕྲུལ་འདུས་པ་མདོ་དང་ནི༔
བླ་མ་དགོངས་འདུས་བཀའ་བརྒྱད་ཀྱི༔
གཙོ་འཁོར་དམ་ཡེ་གཉིས་མེད་པ༔
རང་བྱུང་ལྷུན་གྲུབ་ཆེན་པོར་བསྒོམ༔
དགང་བླུགས་ཐོག་ནས།
ཀློང་ཡངས་འཁྱིལ་བའི་ཞལ་ཧོམ་དུ༔
དམ་རྫས་བདུད་རྩིའི་འདོད་ཡོན་འབུལ༔
དམ་བསྐོང་མཐུ་དབང་དངོས་གྲུབ་སྩོལ༔
ལས་བཞི་མྱུར་དུ་འགྲུབ་པར་མཛོད༔
ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་དེ་ཝ་ཌཱ་ཀི་ནི་སརྦ་ཤིནྟཾ་པུཥྚིཾ་ཝ་ཤཾ་མ་ར་ཡ་ཧཱུྃ་སྭཱཧཱ༔
ཞེས་པས་བྱོན་སྐྱེམས་དང་། དེ་ནས་ཡཾ་ཤིང་། མར་ཁུ་བསྲེག་རྫས་རྣམས་བརྒྱ་རྩ་སོགས་འབུལ།
མཆོད་རྫས་རྣམས་སུ་འདོད་གསོལ་ནི།
བསྲེག་རྫས་སྣ་ཚོགས་ཕུལ་བ་ཡི། །
བཅས་རང་ཉེས་ཞི་ཚེ་བསོད་རྒྱས། །
ཁམས་གསུམ་དབང་འདུས་བདུད་བགེགས་སྒྲོལ། །
སྟོབས་དང་རྫུ་འཕྲུལ་ཤེས་བློ་འཕེལ། །
སྐུ་གསུམ་འབྲས་བུ་ཐོབ་པ་དང་། །
རྟེན་འབྲེལ་ཉེས་ཚོགས་ཞི་བར་མཛོད། །
ཅེས་དང་། དམིགས་པ་ནི།
འོད་ཀྱིས་བསྒྲུབ་བྱ་ལ༔
ཁྱབ་པས་ལས་རྣམས་མྱུར་འགྲུབ་བསམ༔
རྗེས་སུ་ཨརྒྷཾ་སོགས་ཀྱི་མཆོད༔
པཉྩ་ཨ་མྲི་ཏ་ཁཱ་ཧི༔
མ་ཧཱ་རཀྟ་ཁཱ་ཧི༔
མ་ཧཱ་བ་ལིངྟ་ཁཱ་ཧི༔
སངས་རྒྱས་ཀུན་གྱི་བདག་ཉིད་མཆོག༔
ཞི་ཁྲོའི་ལྷ་རྣམས་འདུས་པའི་དཔལ༔
ཡིད་བཞིན་ནོར་ལྟར་འདོད་དགུའི་གཏེར༔
པདྨ་ཐོད་ཕྲེང་རྩལ་ལ་བསྟོད༔
པདྨ་ས་ཏྭའི་ཡིག་བརྒྱ་ལན་གསུམ་བརྗོད་པས་ནོངས་པས་བཤགས༔
ལྷ་རྣམས་རང་སེམས་དབྱེར་མེད་ངང་༔
མི་དམིགས་སྤྲོས་བྲལ་དབྱིངས་སུ་བཞག༔
རྗེས་ཐོབ་གུ་རུའི་གཟུགས་སྐུར་ལྡང་༔
སྤྱོད་ལམ་ཡེ་ཤེས་རོལ་པར་ཁྱེར༔
རྗེས་སུ་བསྔོ་སྨོན་ཤིས་བརྗོད་ཀྱི་མཐའ་རྒྱན། མེ་རང་ཞི་འཇོག་པའམ་དྲི་བཟང་གི་ཆུས་གཞིལ་བར་བྱའོ། །
ཅེས་པའང་ཀཿཐོག་མཁན་རིན་པོ་ཆེ་ལེགས་བཤད་འབྱོར་ལྡན་ཀྱི་གསུང་གི་བསྐུལ་བཞིན་ཆོས་ཀྱི་བློ་གྲོས་པས་བྲིས་པ་ཉེས་འགལ་མཆིས་ན་ཆོས་ཀྱི་བདག་པོར་བཤགས་ཤིང་དགེ་བས་སྣོད་བཅུད་ཀྱི་རྟེན་འབྲེལ་ཉེས་ཚོགས་ཐམས་ཅད་ཞི་བའི་རྒྱུར་གྱུར་ཅིག །མངྒ་ལཾ། ཤུ་བྷཾ། །།
