Chimé Pakmé Nyingtik—Tibetan

Chimé Pakmé Nyingtik | Tibetan Mastersའཇམ་དབྱངས་མཁྱེན་བརྩེའི་དབང་པོ།

English | བོད་ཡིག

འཇམ་དབྱངས་མཁྱེན་བརྩེའི་དབང་པོ།

Chimé Pakmé Nyingtik thangka that belonged to Khyentse Wangpo

Further Information:

༄༅། །འཆི་མེད་འཕགས་མའི་སྙིང་ཏིག་ལས། རྒྱུན་གྱི་རྣལ་འབྱོར་ཕྱག་རྒྱ་གཅིག་པ་བཞུགས།

ན་མོ་གུ་རུ་ཨཱརྻ་ཏཱ་རཱ་ཡཻ།

འདིར་འཆི་མེད་འཕགས་མའི་སྙིང་ཏིག་གི་རྩ་བའི་སྒྲུབ་པ་ཕྲིན་ལས་ཡེ་ཤེས་སྣང་བའི་དོན་གྱི་སྙིང་པོའི་བཅུད་ཕྱུང་བ་རྒྱུན་གྱི་རྣལ་འབྱོར་ཕྱག་རྒྱ་གཅིག་པ་ཉམས་སུ་བླང་བའི་ཚུལ་ལ་གསུམ། སྔོན་འགྲོ། དངོས་གཞི། རྗེས་སོ། །

དང་པོ་ནི། འདི་ཉིད་ཀྱི་སྨིན་བྱེད་ལེགས་པར་ཐོབ་ཅིང་དམ་ཚིག་དང་སྡོམ་པར་ལྡན་པ། བྱང་ཆུབ་སེམས་གཉིས་ཀྱི་བློ་འབྱོངས་ཤིང་བརྩོན་འགྲུས་ཡལ་བར་མི་འདོར་བས། གནས་དབེན་པར་བསམ་གཏན་གྱི་སྤྱོད་ལམ་དང་ལྡན་པས།

མདུན་གྱི་ནམ་མཁར་སྐྱབས་གནས་ཀུན་འདུས་བླ་མ་ཡིད་བཞིན་འཁོར་ལོའི་སྤྱན་སྔར་རང་གཞན་ཡིད་ཅན་ཐམས་ཅད་སྒོ་གསུམ་འཇུག་པ་གཅིག་པས་སྐྱབས་སུ་གསོལ་ཞིང་སེམས་བསྐྱེད་པར་མོས་པས།

ན་མོ༔ བདག་སོགས་འགྲོ་ཀུན་བྱང་ཆུབ་བར༔

དཀོན་མཆོག་གསུམ་གྱི་ངོ་བོ་ཉིད༔

བླ་མ་ཡིད་བཞིན་འཁོར་ལོ་ལ༔

མི་ཕྱེད་གུས་པས་སྐྱབས་སུ་མཆི༔

ལན་གསུམ།

ཧོཿ མཁའ་མཉམ་སེམས་ཅན་མ་ལུས་ཀུན༔

སྡུག་བསྔལ་མཚོ་ལས་བསྒྲལ་བྱའི་ཕྱིར༔

རྗེ་བཙུན་འཕགས་མའི་རྣལ་འབྱོར་གྱིས༔

འཆི་མེད་བསྒྲུབ་པར་སེམས་བསྐྱེད་དོ༔

ལན་གསུམ།

ཧཱུྃ་ཧཱུྃ་ཧཱུྃ། ཞེས་རྡོ་རྗེའི་སྔགས་ཀྱི་རང་སྒྲས་གདུག་པ་ཅན་ཐམས་ཅད་རིང་དུ་བསྐྲད། 

བཛྲ་ཛྙཱ་ན་རཀྵ་ཨཱཿཧཱུྃ་གིས་སྲུང་བའི་འཁོར་ལོ་བརྟན་པར་བསྒོམ།

དངོས་སུ་བཤམས་པའི་མཆོད་པ་ཡོད་ན།

ཨོཾ་ཨཱཿཧཱུྃ་སརྦ་པཱུ་ཛ་མེ་གྷ་ས་མ་ཡེ་ཧཱུྃ༔

ཞེས་དང་ནམ་མཁའ་མཛོད་ཀྱི་ཕྱག་རྒྱ་དང་བཅས་པས་བརླབ་བོ། །

གཉིས་པ་ལ་གཉིས། མཉམ་བཞག་གི་ཉམས་ལེན་གྱི་གཙོ་བོ་ལྷ་བསྒོམ་པ་དང༌། དེའི་ཡན་ལག་ཏུ་བཟླས་བརྗོད་ཀྱི་བསམ་གཏན་ལ་འཇུག་པའོ། །

དང་པོ་ལ་གསུམ། དམ་ཚིག་པ་གསལ་གདབ་པ། ཡེ་ཤེས་པ་སྤྱན་དྲངས་ཤིང་བསྟིམ་པ། ལྷ་སྐུའི་གསལ་སྣང་ལ་སེམས་བཟུང་བའོ། །

དང་པོ་ནི། རྒྱུ་ཏིང་ངེ་འཛིན་གསུམ་གྱི་ཁོག་ཕུབ་ཅིང༌། འབྲས་བུ་རྟེན་དང་བརྟེན་པའི་དཀྱིལ་འཁོར་སྐྱེད་ཚུལ་དམིགས་འདོན་ཟུང་དུ་ཆུད་པས།

ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅་ཧཾ༔

འཁོར་འདས་ཆོས་ཀུན་གཟོད་མ་ནས༔

འོད་གསལ་དེ་བཞིན་ཉིད་དབྱིངས་ལས༔

ཟུང་འཇུག་ཀུན་སྣང་སྙིང་རྗེའི་རྩལ༔

རྒྱུ་ཡི་ཏིང་འཛིན་ཏཱྃ་དཀར་པོ༔

མཁའ་ལས་འཇའ་ཚོན་བཞིན་དུ་ཤར༔

འོད་འཕྲོས་སྣོད་བཅུད་དངོས་འཛིན་སྦྱངས༔

འབྱུང་ལྔ་ཡུམ་གྱི་མཁའ་ཀློང་དུ༔

ནོར་བུ་ཆུ་ཤེལ་ལས་གྲུབ་པའི༔

ཐར་པ་ཆེན་པོའི་གཞལ་མེད་ཁང་༔

གྲུ་བཞི་སྒོ་བཞི་མཚན་ཉིད་རྫོགས༔

དེ་དབུས་པདྨ་འདབ་བཞིའི་སྟེང་༔

ཐབས་ཤེས་ཉི་ཟླ་ཁ་སྦྱོར་དབུས༔

ཟུང་འཇུག་ཏཱྃ་ཡིག་སྙོམ་པར་ཞུགས༔

དེ་ལས་འོད་འཕྲོས་འཕགས་པ་མཆོད༔

འཁོར་འདས་དྭངས་བཅུད་གཅིག་ཏུ་འདུས༔

ཡོངས་གྱུར་ཡེ་ཤེས་སྒྱུ་མའི་སྐུ༔

དུས་གསུམ་རྒྱལ་བའི་ཕྲིན་ལས་བདག༔

འཆི་མེད་ཡིད་བཞིན་འཁོར་ལོ་ནི༔

རབ་དཀར་ཞལ་གཅིག་ཕྱག་གཉིས་མ༔

ཕྱག་གཡས་མཆོག་སྦྱིན་གཡོན་པ་ནི༔

དཀོན་མཆོག་གསུམ་མཚོན་སྐྱབས་སྦྱིན་རྒྱས༔

ཨུཏྤ་ལར་གནས་ཚེ་བུམ་བསྣམས༔

ཞི་འཛུམ་ཡེ་ཤེས་སྤྱན་བདུན་ལྡན༔

དར་དང་རིན་ཆེན་རྒྱན་གྱིས་མཛེས༔

ཞབས་གཉིས་རྡོ་རྗེའི་སྐྱིལ་ཀྲུང་གིས༔

པདྨ་ཟླ་བའི་གདན་ལ་བཞུགས༔

རང་འོད་ཐབས་མཆོག་གར་གྱི་དབང་༔

པདྨ་ཚེ་བུམ་བསྣམས་པས་འཁྲིལ༔

གཉིས་པ་ནི།

དེ་ཡི་སྤྱི་མགྲིན་ཐུགས་ཀ་རུ༔

རྡོ་རྗེ་གསུམ་གྱི་ཡི་གེས་མཚན༔

དེ་ལས་འཕྲོས་པའི་འོད་ཟེར་གྱིས༔

ཡེ་ཤེས་སེམས་དཔའ་སྤྱན་དྲངས་གྱུར༔

ཅེས་གསལ་བཏབ་ལ།

ཧྲཱིཿ སོ་སོར་ཀུན་ཏུ་རྟོག་པ་ཡི༔

ཡེ་ཤེས་ཆེན་པོ་ཚེ་ཡི་ལྷ༔

འོད་དཔག་མེད་པའི་དབུ་རྒྱན་ཅན༔

དུས་གསུམ་སངས་རྒྱས་ཕྲིན་ལས་མ༔

ཚུར་གཤེགས་ཡིད་བཞིན་འཁོར་ལོར་འཆང་༔

སྒྲུབ་ལ་དངོས་གྲུབ་མཆོག་སྩོལ་ཕྱིར༔

དམ་ཚིག་དཀྱིལ་འཁོར་འདིར་དགོངས་ལ༔

རྡོ་རྗེའི་ཡེ་ཤེས་བསྐྱེད་དུ་གསོལ༔

ས་མ་ཡ་ཧོཿ ས་མ་ཡ་སྟྭྃ༔ ཨེ་ཨཱ་རལླི་ཧྲཱིཾ་ཧྲཱིཾ་ཛཿ ཛྙཱ་ན་སཏྭ་ཨ་ཨཱཿ

ཞེས་པས་སྤྱན་དྲངས་པའི་ཡེ་ཤེས་པ་བཛྲ་ཛྙཱ་ན་ཛཿ ཧཱུྃ་བྃ་ཧོཿ ས་མ་ཡ་ཏིཥྛ་ལྷན༔

ཅེས་དགུག་གཞུག་བཅིང་མཉེས་དགྱེས་པ་བསྐྱེད་ཅིང་བརྟན་པར་བཞུགས་སུ་གསོལ།

ཞར་བྱུང་ཕྱག་མཆོད་བསྟོད་པ་མདོར་བསྡུས་བྱེད་པར་སྤྲོ་ན།

ཨ་ལ་ལ་ཧོཿ ཨ་ཏི་པུ་ཧོཿ པྲ་ཏཱིཙྪ་ཧོཿས་ཕྱག་བྱ།

ཨོཾ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔

ཕྱི་ནང་གསང་བའི་མཆོད་རྫས་ཀུན༔

འཕགས་མ་ཡིད་བཞིན་འཁོར་ལོར་འབུལ༔

བཞེས་ནས་འཆི་མེད་དངོས་གྲུབ་སྩོལ༔

ཨོཾ་ཨཱརྻ་ཏཱ་རཱ་ས་པ་རི་ཝ་ར་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱཱ་ཤཔྡ་རཱུ་པ་ཤཔྡ་གནྡྷེ་རཱ་ས་སྤརྴེ་པྲ་ཏཱིཙྪ་སྭཱ་ཧཱ༔ སརྦ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བ་ལིཾ་ཏ་ཁཱ་ཧི༔ སརྦ་དྷརྨ་དྷ་ཏུ་ཨཱཏྨ་ཀོ྅་ཧཾ༔

ཞེས་ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད།

ཨོཾ༔ འཇིག་རྟེན་དབང་ཕྱུག་སྙིང་རྗེའི་བདག༔

ཞལ་གྱི་ཆུ་སྐྱེས་ལས་བྱུང་བ༔

དུས་གསུམ་སངས་རྒྱས་སྐྱེད་མཛད་ཡུམ༔

ཡིད་བཞིན་འཁོར་ལོར་ཕྱག་འཚལ་བསྟོད༔

ཅེས་བསྟོད།

གསུམ་པ་ནི། དམ་ཚིག་ཡེ་ཤེས་དབྱེར་མེད་པའི་ལྷ་སྐུ་ཕྱག་རྒྱ་ཆེན་པོ་སྤྱི་དང་བྱེ་བྲག་གི་གསལ་སྣང་ལ་རྩེ་གཅིག་ཏུ་སེམས་བཟུང༌།

ང་རྒྱལ་བརྟན་པོར་བསྐྱེད།

གསལ་བརྟན་གྱི་ཉམས་སྐྱེས་པ་ན་གཞི་འབྲས་སྦྲེལ་བའི་དག་པ་དྲན་པས་བསྐྱེད་རིམ་མཆོག་གི་དངོས་གྲུབ་ཀྱི་ཉེ་རྒྱུར་སྨིན་པ་ལ་བསླབ་པར་བྱའོ། །

གཉིས་པ་ནི། དེ་ལྟ་བུའི་སྒོམ་པས་དུབ་ན། བོགས་འབྱིན་པའི་སླད་དུ་བཟླས་བརྗོད་ཀྱི་བསམ་གཏན་ལ་བསླབ་པ་ནི།

རང་ཉིད་འཕགས་མའི་ཐུགས་ཀ་རུ༔

ཡེ་ཤེས་སེམས་དཔའ་ཚེ་དཔག་མེད༔

དཀར་གསལ་མཉམ་གཞག་ཚེ་བུམ་འཛིན༔

དར་དང་རིན་ཆེན་རྒྱན་གྱིས་མཛེས༔

རྡོ་རྗེའི་སྐྱིལ་ཀྲུང་པད་ཟླར་བཞུགས༔

འོད་དང་འོད་ཟེར་འཕྲོ་བ་ཡི༔

ཐུགས་དབུས་ཆུ་སྐྱེས་ཉི་ཟླའི་དབུས༔

ཏཱྃ་མཐར་སྔགས་ཀྱི་ཕྲེང་བས་བསྐོར༔

བཟླས་པས་ཐུགས་དམ་རྒྱུད་བསྐུལ་ཏེ༔

འོད་ཀྱི་སྣང་བ་མཐའ་ཡས་པ༔

གཙུག་ཏོར་ནོར་བུའི་རྩེ་ནས་འཐོན༔

དེ་ལས་འཕགས་མ་རྣམ་པར་རྒྱལ༔

ཆུ་ཤེལ་མདོག་ཅན་ཕྱག་གཡས་ཀྱིས༔

སྐྱབས་སྦྱིན་ཕྱག་རྒྱས་ལྕགས་ཀྱུ་དང་༔

གཡོན་པས་མཆོག་སྦྱིན་ཚེ་བུམ་བསྣམས༔

འོད་དང་འོད་ཟེར་དང་བཅས་པ༔

གྲངས་མེད་ཉི་ཟེར་རྡུལ་ལྟར་འཕྲོས༔

འཁོར་འདས་བརྟན་གཡོའི་དྭངས་བཅུད་ཀུན༔

བདེ་བ་ཆེན་པོའི་རྣམ་པར་བསྡུས༔

བདག་གི་སྒོ་གསུམ་ཐིག་ལེར་ཐིམ༔

འཆི་མེད་ཚེ་ཡི་དངོས་གྲུབ་དང་༔

བདེ་ཆེན་ཡེ་ཤེས་རྒྱས་པར་གྱུར༔

ཅེས་བརྗོད་ཅིང་བསམས་ལ་དྲན་པ་མངོན་དུ་བཞག་སྟེ།

ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔

ཞེས་རྡོ་རྗེའི་ཡི་གེ་བཅུ་པ་གཙོ་བོར་བཟླ་ཞིང༌།

ཐུན་མཐར། བསྙེན་སྒྲུབ་ལས་གསུམ་ཆིག་དྲིལ་གྱི་སྔགས།

ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱིཿབྷྲཱུྃ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ༔

ཞེས་པའང་ཅི་རིགས་པ་དང་སྤྲོ་ཞིང་ནུས་ན།

ཨོཾ་ཨ་མཱ་ར་ཎི་ཛཱི་ཝནྟི་ཡེ་སྭཱ་ཧཱ༔

ཞེས་དང༌།

ཨོཾ་ཨ་མྲྀ་ཏ་ཨ་ཡུརྡ་དེ་སྭཱ་ཧཱ༔

ཞེས་པའང་ཅུང་ཟད་རེ་བཟླའོ། །

གསུམ་པ་ནི། ཐུན་དེ་ལས་ལྡང་བར་བརྩམ་པ་ན། དབྱངས་གསལ། རྟེན་སྙིང་གིས་སྔགས་ཀྱི་ལྷག་ཆད་ཁ་བསྐང་ཞིང་བརྟན་པར་བྱ།

ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ ཨོཾ་ཡེ་དྷརྨཱ་ཧེ་ཏུ་པྲ་བྷཱ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝྃ་ཝཱ་དཱི་མ་ཧཱ་ཤྲ་མ་ཎཿསྭཱ་ཧཱ།

མཆོད་བསྟོད་མདོར་བསྡུས་དང༌། ཡི་གེ་བརྒྱ་པས་ནོངས་པ་བཤགས།

ཨོཾ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔

ཕྱི་ནང་གསང་བའི་མཆོད་རྫས་ཀུན༔

འཕགས་མ་ཡིད་བཞིན་འཁོར་ལོར་འབུལ༔

བཞེས་ནས་འཆི་མེད་དངོས་གྲུབ་སྩོལ༔

ཨོཾ་ཨཱརྻ་ཏཱ་རཱ་ས་པ་རི་ཝ་ར་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱཱ་ཤཔྡ་རཱུ་པ་ཤཔྡ་གནྡྷེ་རཱ་ས་སྤརྴེ་པྲ་ཏཱིཙྪ་སྭཱ་ཧཱ༔ སརྦ་པཉྩ་ཨ་མྲྀ་ཏ་མ་ཧཱ་རཀྟ་མ་ཧཱ་བ་ལིཾ་ཏ་ཁཱ་ཧི༔ སརྦ་དྷརྨ་དྷ་ཏུ་ཨཱཏྨ་ཀོ྅་ཧཾ༔

ཨོཾ༔ འཇིག་རྟེན་དབང་ཕྱུག་སྙིང་རྗེའི་བདག༔

ཞལ་གྱི་ཆུ་སྐྱེས་ལས་བྱུང་བ༔

དུས་གསུམ་སངས་རྒྱས་སྐྱེད་མཛད་ཡུམ༔

ཡིད་བཞིན་འཁོར་ལོར་ཕྱག་འཚལ་བསྟོད༔

ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ། ཀུ་རུ་ཧཱུྂ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ

ཨ། རིག་པ་རང་སྣང་དམ་ཚིག་པ༔

ཞལ་ཕྱག་མཚན་མ་དབྱིངས་སུ་ཐིམ། །

སླར་ཡང་མཁའ་ལས་འཇའ་ཚོན་ལྟར། །

ཡེ་ཤེས་ཆེན་པོའི་རོལ་པར་ཤར༔

ཞེས་པས་ལྷར་སྣང་འོད་གསལ་དབྱིངས་སུ་བསྡུ་ཞིང༌། ཟུང་འཇུག་གི་སྐུར་ལྡང༌།

ཨོཾ་ཨཱཿཧཱུྃ་གིས་སྒོ་གསུམ་རྡོ་རྗེ་གསུམ་དུ་རྒྱས་གདབ།

དགེ་བ་འདི་ཡིས་མྱུར་དུ་བདག །

འཆི་མེད་འཕགས་མ་འགྲུབ་གྱུར་ནས། །

འགྲོ་བ་གཅིག་ཀྱང་མ་ལུས་པ། །

དེ་ཡི་ས་ལ་འགོད་པར་ཤོག །

ཅེས་བསྔོ་སྨོན་དང༌། །ཤིས་བརྗོད་ཇི་ལྟར་རིགས་པས་མཚམས་སྦྱར་ཏེ་སྤྱོད་ལམ་ལ་འཇུག་གོ །

ཞེས་ལམ་ངེས་རྫོགས་ཀྱི་དབང་དུ་བྱས་ཏེ་ལས་དང་པོ་པའི་རྣལ་འབྱོར་རམ། སྤྱིར་རྒྱུན་གྱི་ཉམས་ལེན་འཇུག་པ་བདེ་བ་ཕྱག་རྒྱ་གཅིག་པའི་རྣལ་འབྱོར་འདི་ཉིད། རྒྱལ་བས་ལུང་བསྟན་པ་ཀུན་མཁྱེན་རྡོ་རྗེ་འཆང་བློ་གྲོས་མཐའ་ཡས་པའི་སྡེས་ཡང་ནས་ཡང་དུ་བཀའ་སྩལ་པ་དད་བརྒྱའི་གཙུག་གི་སྤྱི་བོར་མཆོད་དེ། གཏེར་གཞུང་རྩ་བའི་དགོངས་པ་ཇི་ལྟ་བར་མཚོ་སྐྱེས་བླ་མ་དགྱེས་པའི་འབངས་པདྨ་འོད་གསལ་མདོ་སྔགས་གླིང་པས་དཔལ་སྤུངས་ཡིད་དགའ་ཆོས་འཛིན་གྱི་གནྡྷོ་ལ་སྒྲོལ་མ་དགྱེས་པའི་ཉེ་འདབས་སུ་བྲིས་པའི་དགེ་བས་དཔལ་ལྡན་བླ་མ་དམ་པ་ཞབས་པད་བསྐལ་བརྒྱར་བརྟན་ཅིང༌། མཐའ་ཡས་པའི་སེམས་ཅན་ཐམས་ཅད་རྗེ་བཙུན་འཆི་མེད་སྒྲོལ་མའི་ཡེ་ཤེས་ཀྱི་སྐུ་མངོན་དུ་འགྲུབ་པའི་རྒྱུར་གྱུར་ཅིག །

མངྒ་ལཾ།། །།

 

• Download this text: EPUB MOBI PDF