Short Yumka Tsok—Tibetan

Collections & Cycles › Longchen Nyingtik | Practices › Tsok | Tibetan Mastersའཇམ་དབྱངས་མཁྱེན་བརྩེའི་དབང་པོ།

English | བོད་ཡིག

༄༅། །ཡུམ་ཀ་མཁའ་འགྲོའི་ཚོགས་ཀྱི་མཆོད་པ་ཉེ་བར་བསྡུས་པ་གྲུབ་གཉིས་དཔལ་ཕྲེང་།

 

ན་མོ་གུ་རུ་བྷྱཿ

སྙིང་དབུས་མི་ཤིགས་ཐིག་ལེ་ཆེར། །
བདེ་སྟོང་འཕོ་མེད་གྲུབ་པའི་སྲོག །
རྣམ་ཀུན་མཆོག་ལྡན་ཌཱ་ཀི་ནཱིར། །
དུས་གསུམ་དུས་མེད་ཆེན་པོར་འདུད། །

འདིར་རྣལ་འབྱོར་པ་གང་ཞིག་གིས་ཐུན་མོང་མ་ཡིན་པ་རྡོ་རྗེ་ཐེག་པའི་གསང་ལམ་མཐར་ཐུག་པའི་ཐབས་མཁས་ལ་བརྟེན་ནས་ཚོགས་གཉིས་མྱུར་དུ་འདུམས་པར་འདོད་པས་ཉེ་བར་བརྩམ་པའི་ཡན་ལག་ཁྱད་པར་ཅན་ནི་ཚོགས་ཀྱི་འཁོར་ལོ་སྟེ། དེའང་ཡེ་ཤེས་ཀྱི་ཌཱ་ཀི་བདེ་ཆེན་རྒྱལ་མོའི་དཀྱིལ་འཁོར་དུ་ཕྱི་ནང་གནས་ཡུལ་གྱི་མཁའ་འགྲོ་བསམ་གྱིས་མི་ཁྱབ་པ་མཉེས་པར་བྱེད་པ་ལ་རྒྱས་པར་ནི་རང་ཉིད་ཀྱི་ལས་གཞུང་ལས་འབྱུང་བ་ལྟར་ལ། སྤྲོས་པ་ཉེ་བར་བསྡུ་བའམ། གྲངས་གསོག་སོགས་ཀྱི་ཚེ་འཇུག་བདེ་བའི་དབང་དུ་བྱས་ན།

ཐོག་མར་བྱིན་གྱིས་བརླབ་པ་ནི།

ཧོཿ བདེ་བ་ཆེན་པོའི་སྣོད་མཆོག་ཏུ༔

ཚོགས་ཀྱི་འཁོར་ལོའི་ལོངས་སྤྱོད་ནི༔

བླང་དོར་མེད་པའི་དམ་ཚིག་རྫས༔

ཨོཾ་ཨཱཿཧཱུྃ་གིས་བདུད་རྩིར་གྱུར༔

ཚོགས་ཕུད་རིམ་པ་གསུམ་དུ་སྤྲོས་ལ།

ཧཱུྃ། འོག་མིན་གནས་དང་མཁའ་སྤྱོད་ཞིང་༔

དཔའ་བོ་མཁའ་འགྲོ་འདུ་བའི་གནས༔

ཉི་ཤུ་རྩ་བཞི་སྤྲུལ་པའི་ཡུལ༔

ནང་ལྟར་རྡོ་རྗེ་ཕུང་པོའི་གྲོང་༔

སྤྱི་བོ་ཛ་ལནྡྷཱ་ར་སོགས༔

གདན་གསུམ་ཚང་བའི་དཀྱིལ་འཁོར་ན། །

བཞུགས་པའི་དཔའ་བོ་རྣལ་འབྱོར་མ༔

མཁའ་འགྲོ་དང་ནི་མཁའ་འགྲོ་མ༔

ཚོགས་ཀྱི་འདུ་བར་གཤེགས་སུ་གསོལ༔

དབུ་སྐྲའི་ཐོར་ཚུགས་ལྡེམས་སེ་ལྡེམ༔

ལྕང་ལོའི་ཟར་བུ་ཏ་ལ་ལ༔

སྙན་ཆ་གདུ་བུ་ཀྱི་ལི་ལི༔

རུས་རྒྱན་གཡེར་ཁ་ཁྲོ་ལོ་ལོ༔

ཅང་ཏེའུ་དྲིལ་བུའི་སྒྲ་དང་བཅས༔

རྡོ་རྗེའི་གླུ་དང་གར་ལ་རོལ༔

འདོད་ཡོན་ལོངས་སྤྱོད་ཚོགས་སུ་འབུལ༔

དམ་ཚིག་ཉམས་པ་མཐོལ་ལོ་བཤགས༔

ཕྱི་ནང་བར་ཆད་དབྱིངས་སུ་སྒྲོལ༔

མཆོག་དང་ཐུན་མོང་དངོས་གྲུབ་སྩོལ༔

ཡི་གེ་བརྒྱ་པ་བརྗོད།

དེ་ནས་ལྷག་མ་བསྔོ་བ་ནི།

ཨ་ཀཱ་རོས་བརླབ་

ཕེཾ་ཕེཾ༔ ལྷག་ལ་དབང་བའི་བཀའ་ཉན་ནི༔

མཁའ་འགྲོ་སུམ་ཅུ་རྩ་གཉིས་དང་༔

གིང་ཆེན་ཁྱོ་ཤུག་ལངྐ་འབུམ༔

ཕོ་ཉ་སུམ་བརྒྱ་དྲུག་ཅུ་དང་༔

མགྱོགས་མ་བཞི་དང་འབར་མ་བརྒྱད༔

མ་མོ་བདུན་དང་སྲིང་མོ་བཞི༔

ཤུགས་འགྲོ་གནས་ཉུལ་ཕྲ་མེན་རྣམས༔

ལྷག་ལ་གདུངས་ཤིང་ཚོགས་ཁང་འགྲིམ༔

ཕམ་ཕབས་བཟང་པོ་འདི་བཞེས་ལ༔

མི་མཐུན་རྐྱེན་ངན་བར་ཆད་སོལ༔

བཅོལ་བའི་ཕྲིན་ལས་འགྲུབ་པར་མཛོད༔

ཅེས་པས་ཕྱི་རོལ་དུ་དོར།

ཡེ་ཤེས་མཁའ་འགྲོའི་གྲོང་ཁྱེར་དུ། །

ཚོགས་ཀྱི་འཁོར་ལོ་བསྐོར་བ་ཡིས།

བདག་གཞན་འགྲོ་བ་མ་ལུས་པ།

དཀྱིལ་འཁོར་གཅིག་ཏུ་འགྲུབ་པར་ཤོག སོགས་ཀྱིས་སྨོན་ལམ་གདབ་པར་བྱའོ། །

འདི་ཡང་ཀུན་མཁྱེན་བླ་མ་དང་། །
དབྱེར་མེད་མཁའ་འགྲོའི་ཚོགས་རྗེ་ཡིས། །
བྱིན་གྱིས་བརླབས་པའི་ཉེར་ལེན་ལས། །
བྱུང་ཕྱིར་སྐལ་བཟང་རྣམས་ཀྱིས་ལོངས། །

 

ཞེས་པའང་དཔལ་ས་ལ་སྤྱོད་པའི་འོག་མིན་བསྒྲགས་མདའ་མཚོ་རྒྱལ་བླ་མཚོར་ཡུམ་ཀ་མཁའ་འགྲོའི་དཀྱིལ་འཁོར་དུ་ཚོགས་ཀྱི་འཁོར་ལོ་སྟོང་ཕྲག་ཐལ་བ་བགྱིས་པའི་ཚེ་རིག་འཛིན་གྱི་བཙུན་པ་པདྨ་དགྱེས་པའི་སྡེས་གནས་དེ་ཉིད་དུ་རྩ་བའི་གཞུང་ལས་བསྡུས་ཏེ་སྦྱར་བའི་དགེ་བས་འགྲོ་ཀུན་མཁའ་སྤྱོད་རྡོ་རྗེ་བཙུན་མོས་རྗེས་སུ་འཛིན་པའི་རྒྱུར་གྱུར་ཅིག། །།སརྦ་ཤུབྷཾ།། །།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK