Dukngal Rangdrol Self-Initiation—Tibetan

Collections & Cycles › Longchen Nyingtik | Practices › Empowerment | Deities › Avalokiteśvara | Tibetan Mastersའཇིགས་མེད་གླིང་པ།

English | བོད་ཡིག

འཇིགས་མེད་གླིང་པ།

Avalokiteśvara, the Great Compassionate One

Further Information:
Download this text:

འུྃཿ ཐུགས་རྗེ་ཆེན་པོ་སྡུག་བསྔལ་རང་གྲོལ་ལསཿ དབང་དོན་བདག་འཇུག་གསལ་བ་བཞུགསཿ

 

འཕགས་པ་ཐུགས་རྗེ་ཅན་ལ་ཕྱག་འཚལ་ལོ། །

སྤྱན་རས་གཟིགས་སྡུག་བསྔལ་རང་གྲོལ་གྱི་དཀྱིལ་འཁོར་དུ་འཇུག་ཅིང་དབང་བསྐུར་བའི་ཆོ་ག་ལ་གསུམ་ལས།

དང་པོ་ནི།

མ་དལ་པདྨ་འདབ་བཞི་སྒོ་རྫོགས་ཅན་གྱི་གནས་སོ་སོར་ལྷ་མཚན་དགུ་དང་། བུམ་པ། གསང་རྫས། རིག་ཙཀ །མེ་ལོང་ཤེལ་རྡོ། གཏོར་མ། ཉེར་སྤྱོད་སོགས་བཤམ་མོ། །

གཉིས་པ་ལ།

དཀྱིལ་འཁོར་བསྒྲུབ་མཆོད་སྔོན་དུ་བཏང་ནས་བཟླས་པ་ཅི་ནུས་དང་། རྣམ་བུམ་ལ་དམིགས་ནས་རྩ་སྔགས་ལ་དབྱངས་གསལ་བཏགས་པ་དང་། ལས་བུམ་དུ་རྟ་མགྲིན་གྱི་ལས་སྔགས་བཟླའོ། །

དེ་ནས་བདག་འཇུག་ནི།

ཁྲུས་བྱ། བགེགས་བསྐྲད།

ཨ་ཁཾ་ཝཱི་རས་མེ་ཏོག་བཟུང་། 

ཨོཾ་ཨཱ་ཧཱུྃ་གིས་མིག་དར་འཆིང་། །

ཀུན་མཁྱེན་ཡེ་ཤེས་ཕུང་པོ་ཅན། །

སྲིད་པའི་འཁོར་ལོ་རྣམ་སྦྱངས་པ། །

དེ་རིང་བཤད་པའི་རིན་ཆེན་གཏེར། །

གཙོ་བོས་བདག་ལ་བཀའ་དྲིན་སྩོལ། །

ལན་གསུམ་གྱིས་གསོལ་བ་གདབ།

ཧོཿ རྡོ་རྗེ་སློབ་དཔོན་སངས་རྒྱས་དཔལ༔

དུས་གསུམ་བཞུགས་ལ་ཕྱག་འཚལ་ལོ༔

མཆོག་གསུམ་བསྟེན་པའི་ཞིང་གྱུར་ལ༔

གཉིས་མེད་ཡིད་ཀྱིས་སྐྱབས་སུ་མཆི༔

དངོས་འབྱོར་ཡིད་ཀྱིས་རྣམ་སྤྲུལ་པའི༔

དག་པའི་མཆོད་པ་བཞེས་སུ་གསོལ༔

དངོས་གྲུབ་ཆུ་བོ་གཅོད་པའི་གེགས༔

ཉེས་བྱས་མ་ལུས་བཤགས་པར་བགྱི༔

ཕྱོགས་བཅུ་འཁོར་གསུམ་དག་པའི་ཆོས༔

མ་ཆགས་སྤྱོད་ལ་རྗེས་ཡི་རང་༔

དག་པའི་མཐའ་བཞི་དྲི་མ་མེད༔

རྫོགས་པའི་བྱང་ཆུབ་སེམས་བསྐྱེད་དོ༔

བདེ་གཤེགས་དབང་ཕྱུག་སེམས་ཅན་ལ༔

དགོས་པ་གསུམ་ཕྱིར་ལུས་འབུལ་ལོ༔

ཚེ་རབས་བགྲངས་པའི་ལས་རྣམས་ཀུན༔

བསྡུས་ཏེ་བྱང་ཆུབ་ཆེན་པོར་བསྔོ༔

ལན་གསུམ་གྱིས་རྒྱུན་བཤགས་བྱ།

དེ་ནས་སྡོམ་བཟུང་ནི། །

ཐུགས་རྗེ་ཆེན་པོ་སྐྱབས་ཀྱི་མཆོག་ཏུ་འཛིན། །

འགྲོ་བའི་དོན་དུ་སྨོན་འཇུག་སེམས་བསྐྱེད་ཅིང་། །

སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི། །

དམ་ཚིག་སྡོམ་པ་རྟག་ཏུ་བསྐྱེད་པར་བགྱི། །

ལན་གསུམ།

ས་མ་ཡ་པྲ་བེ་ཤ་ཡ་ཧཱུྃ།

ཞེས་པའི་དཀྱིལ་འཁོར་གྱི་སྒོ་ཤག་གིས་ཕྱེ་བར་བསམ། སྙིང་རྗེ་ཆེན་པོའི་སྒོ་ནས་རིམ་པར་སྐུ་གསུང་ཐུགས་ཕྱག་བྱེད་བཞིན་པར།

ཨོཾ་ན་མ་ཏེ་ཧཱུྃ།

ཨོཾ་ན་མ་མོ་ཧཱུྃ།

ཨོཾ་ན་མོ་ན་མ་ཧཱུྃ།

ལན་བཞིའི་མཐར།

དཀྱིལ་འཁོར་གྱི་ཤར་སྒོ་དབང་སྟེགས་པདྨ་འདབ་བརྒྱད་ལ་འཁོད་པས།

གཙོ་བོའི་ཐུགས་ཀ་ནས་འོད་ཟེར་བྱུང་རྣམ་སྨིན་གྱི་ལུས་རྟེན་སྦྱངས།

རྣམ་པར་ཤེས་པ་ཧྲཱིཿཡིག་དཀར་པོར་གྱུར་པ་ཞལ་ནས་དྲངས་སྐུའི་དབྱིབས་བརྒྱུད།

མདུན་གྱི་སྒྲོལ་མའི་མཁའ་གསང་དུ་བབས་བདེ་སྟོང་ལས་བསྐྱེད་པའི་སྲས་ཀྱི་རྣམ་པར་གྱུར་པ་སྔར་གྱི་གདན་ལ་འཁོད།

དེ་ཉིད་ཐུགས་རྗེ་ཆེན་པོར་གསལ་བའི་གནས་གསུམ་དུ་ཡིག་འབྲུ་གསུམ་གྱིས་མཚན་པ་ལས་འོད་ཟེར་འཕྲོས་པས་ཕྱོགས་བཅུའི་དེ་བཞིན་གཤེགས་པ་སྲས་དང་བཅས་པ་སྤྱན་དྲངས་ཐིམ་པས་སྒོ་གསུམ་རྡོ་རྗེ་གསུམ་དུ་གྱུར་པར་བསམས་

ལ་རྩ་སྔགས་ལ་ཨ་བེ་ཤ་ཡ་ཕཻཾ་ཕཻཾ་བཏགས་པས་བྱིན་ཕབ།

པྲ་ཏཱི་ཙྪ་བཛྲ་ཧོཿ ཞེས་མེ་ཏོག་ཕུལ། 

པྲ་ཏི་གྷྲི་ཧྞ་ཨི་མཾ་ས་ཏྭ་མ་ཧཱ་བཱ་ལ་

ཞེས་པས་ལྷག་ལྷ་སྤྱི་བོ་ནས་ཐིམ་པར་བསམ།

ཧོཿ བདེ་གཤེགས་སྙིང་པོ་ཚོགས་བརྒྱད་ཀྱིས། །

ལྡོངས་བའི་མ་རིག་ལིང་ཏོག་ནི། །

ཡེ་ཤེས་ཐུར་མས་བསལ་ནས་ཀྱང་། །

རྣམ་ཐར་སྒོ་གསུམ་བསྟན་དུ་གསོལ། །

ཛྙཱན་ཙཀྵུ་པྲ་བེ་ཤ་ཡ་ཕཊ།

ཅེས་བརྗོད་པས་ཆོས་ཉིད་ཀྱི་བདེན་པ་མཐོང་བར་བསམ།

དེ་ནས་དབང་བསྐུར་བ་ནི།

གཙོ་བོའི་ཐུགས་ཀ་ནས་དབང་རྫས་རྣམས་རིམ་པར་བྱུང་བར་བསམས་ལ།

ཧཱུྃ་བཀྲ་ཤིས་བུམ་པ་ལྷའི་གཞལ་ཡས། །

ལྷ་དང་གཉིས་མེད་བདུད་རྩིའི་ཆུས། །

སྐལ་ལྡན་བུ་ལ་དབང་བསྐུར་བས། །

སྣང་ཞེན་ལྷ་སྐུའི་ཕྱག་རྒྱར་རྫོགས། །

རྣམ་སྨིན་རིག་འཛིན་ཉེར་ཐོབ་ཅིང་། །

ཀུན་ཏུ་འོད་ཀྱིས་ནོན་ཤོག །

རྩ་སྔགས་དང་

ཀཱ་ཡ་ཨ་བྷི་ཥིཉྩ་མུཾ།

དེས་ལུས་དང་རྩའི་སྒྲིབ་པ་དག །

སྐུ་རྡོ་རྗེའི་བྱིན་རླབས་ཞུགས།

བུམ་པའི་དབང་ཐོབ།

བསྐྱེད་རིམ་གྱི་སྣོད་དུ་གྱུར།

རྣམ་སྨིན་རིགས་འཛིན་གྱི་ས་བོན་ཐེབས།

སྤྲུལ་སྐུའི་གོ་འཕང་ཐོབ་པའི་སྐལ་བརྒྱུད་ལ་གཞག་ག །

གསང་རྫས་བྱིན་ལཿ

ཧཱུྃ། ཡབ་ཡུམ་སྦྱོར་བའི་བྱང་ཆུབ་སེམས། །

དཀར་དམར་བྷནྡྷའི་ནང་དུ་བསྐྱིལ། །

སྐལ་ལྡན་བུ་ལ་དབང་བསྐུར་བས། །

རྩ་ཁམས་ཡི་གེའི་རྣམ་པར་སྨིན། །

ཚེ་ལ་དབང་བའི་རིགས་འཛིན་ཐོབ། །

པདྨ་ཅན་གྱི་ས་ནོན་ཤོག །

རྩ་སྔགས་དང་

ཝཱཀྐ་ཨ་བྷི་ཥིཉྩ་མུཾ།

དེས་ངག་གི་ལས་དང་རླུང་གི་སྒྲིབ་པ་དག །

གསུང་རྡོ་རྗེའི་བྱིན་རླབས་ཞུགས།

གསང་བའི་དབང་ཐོབ།

བཟླས་བརྗོད་ཀྱི་སྣོད་དུ་གྱུར།

ཚེ་དབང་རིག་འཛིན་གྱི་ས་བོན་ཐེབས།

ལོངས་སྤྱོད་རྫོགས་པའི་གོ་འཕང་གི་སྐལ་བརྒྱུད་ལ་བཞག་གོ །

རིག་ཙཀ་བཟུང་ལ།

ཧཱུྃ་ཆོས་རྣམས་ཀུན་གྱི་འབྱུང་གནས་ཏེ། །

བདེ་བ་ཆེན་པོ་གསང་བའི་ཡུམ། །

རིགས་ཀྱི་བུ་ལ་བྱིན་པ་ཡིས། །

དགའ་བཞིའི་ཡེ་ཤེས་མངོན་དུ་གྱུར། །

ཕྱག་རྒྱ་ཆེན་པོའི་རིགས་འཛིན་ཐོབ། །

འཁོར་ལོ་ཚོགས་ཆེན་ས་ནོན་ཤོག །

རྩ་སྔགས་དང་།

ཙིཏྟ་ཨབྷི་ཥིཉྩ་མུཾ།

དེས་ཡིད་ཀྱི་ལས་དང་ཐིག་ལེའི་སྒྲིབ་པ་དག །

ཐུགས་རྡོ་རྗེའི་བྱིན་རླབས་ཞུགས།

ཤེས་རབ་ཡེ་ཤེས་ཀྱི་དབང་ཐོབ།

བདེ་སྟོང་ཙཎྜ་ལིའི་སྣོད་དུ་གྱུར།

ཕྱག་རྒྱའི་རིག་འཛིན་གྱི་ས་བོན་ཐེབ།

ཆོས་སྐུའི་གོ་འཕང་གི་སྐལ་བ་རྒྱུད་ལ་བཞག་གོ །

མེ་ལོང་ཤེལ་རྡོ་བརྡས་མཚོན་པར་བྱས་ཏེ།

ཧོཿ ཀ་དག་མེ་ལོང་གཙང་མའི་ངོགས།

ལྷུན་གྲུབ་དངས་ཤེལ་དྲི་མེད་གསལ། །

བརྡ་རྟགས་རྫོགས་པའི་དབང་བསྐུར་བས། །

དྲི་མེད་རིག་པའི་གནས་ལུགས་རྟོགས། །

ལྷུན་གྲུབ་རིག་འཛིན་ཉེར་ཐོབ་ནས། །

བདེ་བ་ཆེན་པོའི་ས་ནོན་ཤོག །

རྩ་སྔགས་དང་།

དྷརྨ་དྷཱ་རྟུ་ཨ་བྷི་ཥིཉྩ་མུཾ།

དེས་ཀུན་གཞིའི་ལས་དང་ཤེས་བྱའི་སྒྲིབ་པ་སྦྱངས།

ཡེ་ཤེས་རྡོ་རྗེའི་བྱིན་རླབས་ཞུགས།

ཚིག་གིས་མཚོན་པའི་དོན་དམ་གྱི་དབང་ཐོབ།

ཀ་དག་རྫོགས་པ་ཆེན་པོའི་སྣོད་དུ་གྱུར།

ལྷུན་གྲུབ་རིགས་འཛིན་གྱི་ས་བོན་ཐེབ།

མཐར་ཐུག་གི་འབྲས་བུ་ངོ་བོ་ཉིད་སྐུའི་སྐལ་བ་རྒྱུད་ལ་བཞག་གོ། །

གསུམ་པ་རྗེས་ལ་

དམ་ཚིག་ཁས་བླང་བ་ནི།

རྩ་བ་སྐུ་གསུང་ཐུགས་མཆོག་དང་། །

ཡན་ལག་དམ་ཚིག་ཉི་ཤུ་ལྔ། །

མེད་དང་གཅིག་པུ་ཕྱལ་བ་སོགས། །

ཆོ་ག་བཞིན་དུ་བསྲུང་བར་བགྱི། །

ལན་གསུམ་གཏང་རག་གི་མཎྜལ་ཕུལ།

གཙོ་བོས་ཇི་ལྟར་བཀའ་སྩལ་པ། །

དེ་དག་ཐམས་ཅད་བདག་གིས་བགྱི། །

ཁྱེད་ལ་བདག་ཀྱང་ཡོངས་སུ་འབུལ། །

སློབ་མར་བཟུང་ནས་སྤྱད་དུ་གསོལ། །

བསྔོ་སྨོན་རྣམས་སྤྱི་ལྟར་བྱ་ཞིང་།

ཆོ་གའི་རྗེས་ཆོ་ག་རྣམས་ཀྱང་དཀྱུས་བཞིན་ནོ། །

 

ཞེས་པའང་རིན་ཆེན་རྡོ་རྗེའི་ངོར་ལྕགས་ཟམ་བླ་བྲང་དུ་བྲིས་པའོ།། །།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK