ཇོ་ལུགས་སྒྲོལ་དཀར་མཎྜལ་གཅིག་པའི་སྒྲུབ་སྐོར་ལས་ཚོགས་དང་བཅས་པ།
༄༅། །ཇོ་ལུགས་སྒྲོལ་དཀར་མཎྜལ་གཅིག་པའི་སྒྲུབ་སྐོར་ལས་ཚོགས་དང་བཅས་པ་བཞུགས་སོ།།
ན་མཿཨརྻ་ཏཱ་རཱ་ཡཻ།
འདིར་ཇོ་བོ་ལས་བརྒྱུད་པའི་སྒྲོལ་དཀར་ཡིད་བཞིན་འཁོར་ལོའི་བསྙེན་པ་བྱ་བར་འདོད་པས། གནས་དབེན་ཞིང་ཉམས་དགའ་ལ་གཞི་བདག་དང་འབྱུང་པོ་གདུག་པ་ཅན་གྱིས་དབང་དུ་མ་བྱས་པར་བྱི་དོར་ལེགས་པར་བྱ། དཀོན་མཆོག་གི་རྟེན་དགྲམ། ཚེ་སྒྲུབ་སྤྲོས་བཅས་དང་འབྲེལ་ན་སྟེགས་བུ་ཁེབས་ལྡན་པདྨ་འདབ་བརྒྱད་རེ་ཁཱ་ཅན་གྱི་དབུས་སུ་སྐུ་སྟེན་ཚེ་བུམ། གསུང་རྟེན་བདུད་རྩི། ཐུགས་རྟེན་ཚེ་རིལ་ཡང་བཤམ། རྒྱུན་བསྙེན་དང་སྒྲུབ་པ་ཇི་ལྟར་ཡང་དཀར་གསུམ་མངར་གསུམ་ཤིང་འབྲས་སོགས་ཀྱིས་བརྒྱན་པའི་དཀར་གཏོར་ཟླུམ་པོ་པད་འདབ་བཞི་པ་དང་། མཐར་ཉེར་སྤྱོད་ཀྱིས་བསྐོར། གྲུབ་ན་གཏོར་མ་ཆ་གསུམ་དང་། མ་བདེ་ན་གཞི་བདག་ལ་དཀར་གཏོར། འབྱུང་པོ་ལ་ཆང་བུ། རིལ་བུ། ཐེབ་ཀྱུ་སོགས་བཤམས་ལ་ཆུ་ཆང་གིས་བྲན།
ཨ་ཀཱ་རོ་ལན་གསུམ་གྱིས་བརླབ།
མཆོད་སྦྱིན་གཏོར་མ་འདི་བཞེས་ལ། ། སོགས་ཀྱི་བསྔོས་ལ་ཕྱི་རོལ་དུ་དོར།
རྣལ་འབྱོར་བདག་ཅག་འཁོར་བཅས་ལ། །
ནད་མེད་ཚེ་དང་དབང་ཕྱུག་དང༌། །
དཔལ་དང་གྲགས་དང་སྐལ་པ་བཟང༌། །
ལོངས་སྤྱོད་རྒྱ་ཆེན་ཀུན་ཐོབ་ཅིང༌། །
ཞི་དང་རྒྱས་ལ་སོགས་པ་ཡི། །
ལས་ཀྱི་དངོས་གྲུབ་བདག་ལ་སྩོལ། །
དམ་ཚིག་ཅན་གྱིས་བདག་ལ་སྲུངས།
དངོས་གྲུབ་ཀུན་གྱི་སྡོངས་གྲོགས་མཛོད། །
དུས་མིན་འཆི་དང་ནད་རྣམས་དང༌། །
གདོན་དང་བགེགས་རྣམས་མེད་པར་མཛོད། །
རྨི་ལམ་ངན་དང་མཚན་མ་ངན། །
བྱ་བྱེད་ངན་པ་མེད་པར་མཛོད། །
འཇིག་རྟེན་བདེ་ཞིང་ལོ་ལེགས་དང༌། །
འབྲུ་རྣམས་འཕེལ་ཞིང་ཕྱུགས་འཕེལ་བ། །
དགེ་ལེགས་ཐམས་ཅད་འབྱུང་བའི་གནས། །
ཡིད་ལ་འདོད་པ་ཀུན་འགྲུབ་མཛོད། །
ཨོཾ་བཛྲ་རཀྵ་ཧཱུྃ།
མི་ཕྱེད་གཉུག་མའི་ཡེ་ཤེས་ཀྱི།
རང་རྩལ་འགག་མེད་རྡོ་རྗེའི་གུར།
འབར་བའི་མེ་འོད་རབ་འཕྲོ་བས།
ཕྱོགས་མཚམས་ཀུན་ཏུ་ཁྱབ་པར་གྱུར།
ཅེས་རྡོ་རྗེ་རྭ་གུར་གྱིས་བསྲུང་འཁོར་བསྒོམ།
དེ་ནས་བྱང་ཆུབ་སེམས་ཀྱི་སྔགས་པ་བརྗོད་པ་ནི།
ངན་འགྲོའི་ལམ་ནི་ལྡོག་བགྱིད་ཅིང་།
མཐོ་རིས་ལམ་ནི་རབ་སྟོན་ལ།
རྒ་ཤི་མེད་པར་འདྲེན་བགྱིད་པ།
བྱང་ཆུབ་སེམས་ལ་ཕྱག་འཚལ་ལོ།
ཞེས་བརྗོད་ཅིང་ཚད་མེད་བཞིས་རྒྱུད་ལེགས་པར་སྦྱང་།
སྐྱབས་འགྲོ་ནི།
སྐྱོབ་པ་མཆོག་དང་བདེན་གཉིས་དམ་པའི་ཆོས།
རིག་གྲོལ་གཉིས་ལྡན་བྱང་ཆུབ་སེམས་དཔའི་ཚོགས།
འཕགས་མའི་སྐུ་གསུང་ཐུགས་ལས་གཞན་མིན་པས།
སྐྱེས་བུ་ཆེན་པོའི་སེམས་ཀྱི་སྐྱབས་སུ་མཆི།
གསུམ།
སེམས་བསྐྱེད་ནི།
ཧོཿ བདག་དང་མར་གྱུར་སེམས་ཅན་ཐམས་ཅད་ཀུན།
གནས་སྐབས་བདུད་བཞིའི་འཇིགས་པ་ལས་གྲོལ་ཞིང་།
མཐར་ཐུག་བྱང་གྲོལ་མཆོག་ལ་འདོང་པའི་ཕྱིར།
སྨོན་དང་འཇུག་པའི་བྱང་ཆུབ་མཆོག་སེམས་བསྐྱེད།
གསུམ།
ཡན་ལག་བདུན་པ་ནི།
ཨཱཿ ཡན་ལག་ལྔས་བཏུད་ལུས་དང་ལོངས་སྤྱོད་འབུལ།
ཉེས་ལྟུང་མི་འཆབ་དགེ་ལ་རྗེས་ཡི་རང་།
ཆོས་འཁོར་བསྐོར་ཞིང་མྱ་ངན་མི་འདར་གསོལ།
དགེ་ཚོགས་འགྲོ་ཀུན་རྣམ་མཁྱེན་ཐོབ་ཕྱིར་བསྔོ།
མཆོད་རྫས་བྱིན་བརླབས་ནི།
ཧཱུྃ། མཆོད་པའི་དམ་རྫས་བརྟན་གཡོའི་དངོས་པོ་ཀུན།
ཀུན་ཏུ་བཟང་པོའི་རྣམ་པར་འཕྲུལ་པ་ཡིས།
ནམ་མཁའ་མཛོད་ཀྱི་འཁོར་ལོར་བྱིན་གྱིས་རློབས།
མཆོད་པའི་ཕྱག་རྒྱ་ཆེན་པོར་ལྷུན་རྫོགས་ཤོག
རཱུ་པ། ཤབྡ། གནྡྷེ། རཱ་ས། སྤརྴེ། དྷརྨ་དྷཱ་ཏུ་སརྦ་པཱུ་ཛ་ཨཱཿཧཱུྃ།
གསུམ།
ནམ་མཁའ་མཛོད་ཀྱི་སྔགས་རྒྱས་བརླབ། སྤྲོ་ན།
ན་མོ་རཏྣ་ཏྲ་ཡཱ་ཡ། ན་མོ་བྷ་ག་ཝཱ་ཏེ། བཛྲ་སཱ་ར་པྲ་མརྡྷ་ནི། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶཾ་བུདྡྷཱ་ཡ། ཏདྱ་ཐཱ། ཨོཾ་བཛྲེ་བཛྲེ་མ་ཧཱ་བཛྲེ། མ་ཧཱ་ཏེ་ཛོ་བཛྲེ། མ་ཧཱ་བིདྱཱ་བཛྲེ། མ་ཧཱ་བོ་དྷི་ཙིཏྟ་བཛྲེ། མ་ཧཱ་བོ་དྷི་མཎྜོ་པ་སཾ་མ་ཎ་བཛྲེ། སརྦ་ཀརྨ་ཨ་བ་ར་ཎ་བི་ཤོ་དྷ་ནི་བཛྲེ་སྭཱ་ཧཱ།
ཞེས་མཆོད་པའི་སྤྲིན་གྱིས་གཟུངས་ཀྱང་བརྗོད།
མངོན་རྟོགས་བསྒོམ་པ་ནི།
ཨ༔ ཆོས་རྣམས་ཐམས་ཅད་སྟོང་ཞིང་བདག་མེད་ཀྱང་།
འདི་ལྟར་མ་རྟོགས་སེམས་ཅན་སྙིང་རེ་རྗེ།
སྐྱེ་མེད་ངང་ལས་སྐྱེ་བའི་ཆོ་འཕྲུལ་ནི།
གཡུ་ལོ་བཀོད་པའི་ཞིང་ཁམས་ཉམས་དགའ་བ།
མནན་ན་ནེམ་ཞིང་བཏེག་ན་འཕར་བའི་གཞིར།
རིན་ཆེན་བཻ་ཌཱུརྻ་ཡི་བྲག་རི་ལ།
དྲང་སྲོང་རིག་འཛིན་གྲུབ་པ་མཆོག་རྣམས་གནས།
འབྱུང་བ་ཡོངས་རྫོགས་དྭངས་པའི་མཚོ་རྫིང་ནི།
པུཎྜ་རཱི་ཀའི་ནེའུ་གསིང་དྲྭ་བས་མཛེས།
རིན་ཆེན་སྣ་ཚོགས་ལྗོན་ཤིང་ལྟ་ན་སྡུག
ཡལ་འདབ་རྣམས་ལ་གསེར་གཡུ་བྱེ་རུ་དང་།
པད་རཱག་ཨིནྡྲ་ནཱི་ལ་ལ་སོགས་པ།
དབང་གཞུ་ལྟ་བུར་བཀྲ་བའི་བྱ་ཚོགས་དང་།
འཕུར་ལྡིང་ཤིན་ཏུ་གཡོ་བའི་བྷྲ་མ་རཿ
སེམས་དང་ཡིད་དང་རྣམ་པར་ཤེས་པ་དང་།
ཀུན་འབྱུང་སྡུག་བསྔལ་སྤོང་བའི་ཆོས་ཀྱི་སྒྲ།
ཐེག་པ་གསུམ་དང་རྒྱུད་སྡེའི་དབྱངས་སུ་སྒྲོགས།
གཟུགས་སྣང་ཐམས་ཅད་དག་པའི་སྣོད་དང་བཅུད།
ཚོར་བ་ཐམས་ཅད་བདེ་སྟོང་ཕྱག་རྒྱ་ཆེ།
འདུ་ཤེས་ཐམས་ཅད་ཕ་རོལ་ཕྱིན་པ་དྲུག
འདུ་བྱེད་ཐམས་ཅད་ས་བཅུའི་སྤངས་རྟོགས་ཏེ།
རྣམ་ཤེས་ལས་འདས་ཡེ་ཤེས་རོལ་པའི་གདངས།
དག་པ་རབ་འབྱམས་ཞིང་ཁམས་བཀོད་པའི་ཀློང་།
རང་བཞིན་ལྷུན་གྲུབ་སྤྲུལ་པའི་གཞལ་མེད་ཁང་།
རྒྱ་ཁྱོན་བཀོད་པ་བློ་ལས་འདས་པའི་དབུས།
པད་ཟླའི་གདན་ལ་ཏཱྃ་ཡིག་ཡོངས་གྱུར་ལས།
རྗེ་བཙུན་སྒྲོལ་དཀར་ཡིད་བཞིན་འཁོར་ལོ་ནི།
ཟླ་བར་རྒྱབ་བརྟེན་རྡོ་རྗེའི་སྐྱིལ་མོ་ཀྲུང་།
ཕྱག་གཡས་མཆོག་སྦྱིན་མི་མཐུན་ཕྱོགས་ལས་སྒྲོལ།
གཡོན་པ་སྐྱབས་སྦྱིན་མཐེབ་མཛུབ་ལ་གནས་པའི།
ཨུཏྤལ་ཟེའུ་འབྲུས་དུས་གསུམ་སངས་རྒྱས་མཚོན།
རིགས་ཀྱི་བདག་པོ་སྣང་བ་མཐའ་ཡས་བརྒྱན།
ཚེ་དང་ཡེ་ཤེས་མཆོག་གི་དངོས་གྲུབ་སྟེར།
འགྲོ་ལ་ཐུགས་རྗེའི་གཟིགས་པ་མི་ཡོལ་བས།
ཕྱག་ཞབས་མཐིལ་སོགས་ཡེ་ཤེས་སྤྱན་བདུན་སྤྲས།
མཉེན་ལྕུག་འཁྲིལ་ལྡེམ་གཞོན་ནུའི་ངང་ཚུལ་ཅན།
གསལ་འཚེར་ལྷུན་སྡུག་གཟི་བྱིན་ལྡན་པ་སྟེ།
ཞི་ཚུལ་དགུ་དང་རྒྱན་ཆ་བཅུ་གསུམ་མཛེས།
མཐའ་བསྐོར་སངས་རྒྱས་བྱང་སེམས་རིག་འཛིན་དང་།
གནས་ཡུལ་ཉེར་བཞིའི་དཔའ་བོ་མཁའ་འགྲོས་བསྐོར།
ཀུན་ཀྱང་གདན་གསུམ་རྡོ་རྗེའི་བདག་ཉིད་ཅན།
ཡོངས་གྲུབ་དབང་བསྐུར་རྫོགས་པའི་པྲོག་ཞུས་བརྒྱན།
གནས་གསུམ་ཕྱག་མཚན་གསུམ་དང་ཡིག་འབྲུ་ལས།
འོད་འཕྲོས་རང་བཞིན་སྤྲོས་བྲལ་གདོད་མའི་དབྱིངས།
སྐུ་གསུམ་ཡན་ལག་བདུན་ལྡན་ལོངས་སྤྱོད་རྫོགས།
གཡུ་ལོ་བཀོད་སོགས་སྤྲུལ་པའི་ཞིང་ཁམས་ནས།
ཡེ་ཤེས་ལྷ་ཚོགས་བཛྲ་ས་མཱ་ཛཿ
སྤྱན་འདྲེན་ནི།
ཧཱུྃ། མཁྱེན་པས་བྱང་ཆུབ་ཆོས་ཁམས་ཡོངས་གཟིགས་ཀྱང་།
བརྩེ་བས་ཞི་ལ་མི་གཞོལ་འཁོར་བ་སྒྲོལ།
ནུས་པས་བདུད་སྡེ་ཕྱིར་འཐག་བཅོམ་ལྡན་མ།
ཚེ་དབང་བདེ་སྦྱིན་ལྷ་མོ་གཤེགས་སུ་གསོལ།
ཨེ་ཧྱེ་ཧི་བྷ་ག་ཝཱན་མ་ཧཱ་ཀཱ་རུ་ཎི་ཀ་དྲི་ཤྱ་ཧོཿ
བཞུགས་གསོལ་བསྟོད་ཕྱག་ནི།
ཨཿ བདེ་གཤེགས་སྙིང་པོའི་རང་བཞིན་ཡེ་ཤེས་སེམས།
གདོད་ནས་དམ་ཚིག་འཁོར་ལོ་རོ་གཅིག་ཀྱང་།
གློ་བུར་སྒྲིབ་གཉིས་སྤངས་པའི་སྟན་ཞུགས་ལ།
མངོན་སུམ་ལྟ་བ་མཇལ་བའི་ཕྱག་གིས་བཏུད།
ན་མོ་ན་མ་ཧཱུྃ།
མཆོད་པ་ནི།
ཧཱུྃ། ཡུལ་དང་དབང་པོ་འབྲེལ་བའི་སྲེད་ལེན་གྱིས།
ཉེར་སྤྱོད་ལས་འདས་མཆོད་པའི་ཕྱག་རྒྱ་ཆེ།
ཀུན་ཏུ་བཟང་པོའི་རྣམ་འཕྲུལ་བླ་ན་མེད།
ནམ་མཁའ་མཛོད་ཀྱིས་འཁོར་ལོས་མཉེས་གྱུར་ཅིག
བཛྲ་རཱུ་པ། ཤབྡ། གནྡྷེ། རཱ་ས། སྤརྴེ། དྷརྨ་དྷ་ཏུ་མ་ཧཱ་སརྦ་པཱུ་ཛ་ཨཱཿཧཱུྃ།
བསྟོད་པ་ནི།
ཨོཾ། ཆུ་སྐྱེས་ཞལ་གྱི་གེ་སར་ལས།
འགྲོ་བ་སྒྲོལ་ཕྱིར་རྣམ་པར་འཕྲུལ།
ཕྲིན་ལས་མྱུར་ཞིང་བདུད་ལ་དཔའ།
བཞད་པ་རབ་བཞད་ཁྱོད་ལ་བསྟོད།
སྦྱིན་པའི་མཆོག་ལྡན་མི་འཇིགས་སྟེར།
སེམས་ཅན་དོན་བྱེད་ཚུལ་ཁྲིམས་དང་།
བཟོད་པའི་དཀའ་ཐུབ་ཉམས་མི་མངའ།
ཤིན་ཏུ་སྦྱངས་པ་ཁྱོད་ལ་བསྟོད།
སུ་ཡི་ཁྱོད་ལ་གསོལ་བཏབ་དོན།
ཡལ་བར་མི་འདོར་བརྩོན་འགྲུས་དང་།
དེ་བཞིན་གཤེགས་དགའི་བསམ་གཏན་དང་།
བྱང་གྲོལ་ཤེས་རབ་ལྷ་མོར་བསྟོད།
བདག་གི་ཚེ་རབས་ཐམས་ཅད་དུ།
ཁ་ན་མ་ཐོའི་ལས་བསགས་པ།
ལྷ་མོ་ཁྱོད་ལ་མཐོལ་ཟིན་གྱིས།
བདུད་བཞིའི་གཡུལ་ལས་རྒྱལ་བར་མཛོད།
བཟླས་དམིགས་ནི།
ཐུགས་ཀར་ཟླ་གདན་ལ་གནས་པའི།
འོད་ཀྱི་རྣམ་པའི་འཁོར་ལོའི་དབུས།
ཏཱྃ་དང་མདུན་རྒྱབ་ཨོཾ་དང་ཧཱ།
རྩིབས་བརྒྱད་ཏཱ་རེ་ལ་སོགས་བརྒྱད།
རེག་ལ་མ་འབྱར་གཡོན་དུ་འཁོད།
འོད་ཟེར་འཕྲོས་པས་རྒྱལ་བ་མཆོད།
སེམས་ཅན་དོན་བྱས་འཁོར་འདས་ཀྱི།
དྭངས་བཅུད་བདག་ལ་ཐིམ་པ་ཡིས།
དུས་མིན་འཆི་བའི་འཇིགས་པ་བསལ།
མཆོག་ཐུན་དངོས་གྲུབ་ཐོབ་པར་གྱུར།
ཨོཾ་ཏཱ་རེ་ཏུཏྟཱ་རེ་ཏུ་རེ་མ་མ་ཨཱ་ཡུར་པུཎྱེ་ཛྙཱ་ན་པུཥྚིཾ་ཀུ་རུསྭཱ་ཧཱ།
ཞེས་སྣང་བ་སྐུ་དང་ཞིང་ཁམས། གྲགས་པ་སྔགས་ཀྱི་རང་སྒྲ། དྲན་རྟོག་ཆོས་ཉིད་ཀྱི་དོན་ལས་མི་འདའ་བའི་ངང་ནས་བཟླས་དམིགས་བྱ་ཞིང་།
ཐུན་བསྡུ་བ་ནི།
ཚོགས་བསགས་པའི་ཕྱིར་མཆོད་པ་བརྗེ། མཎྜལ་རྒྱས་བསྡུས་ཅི་རིགས་པ་དང་།
བསྟོད་བསྔགས་ནི།
སངས་རྒྱས་ཐམས་ཅད་ཁྱོད་ལས་སྐྱེས།
དེ་ཕྱིར་རྒྱལ་བ་ཀུན་གྱི་ཡུམ།
ས་དང་ཕ་རོལ་ཕྱིན་བཅུའི་བདག
སྤྲོས་བྲལ་དབུ་མ་ཆེན་པོར་བསྟོད།
གཟུགས་སོགས་ཕུང་པོའི་ཉེར་ལེན་བདུད།
རང་བཞིན་རྣམ་དག་སྟོང་ཉིད་དབྱིངས།
ལྟོས་གྲུབ་མེད་པར་སྦྱོར་མཛད་པའི།
རྣམ་ཀུན་མཆོག་ལྡན་མ་ལ་བསྟོད།
ཀུན་བརྟགས་ལས་རླུང་བཞོན་པ་དང་།
ལྷན་ཅིག་སྐྱེས་པའི་ཉོན་མོངས་བདུད།
མཐོང་སྤང་བྱང་ཆུབ་ཡན་ལག་གི
ཡེ་ཤེས་མེ་ལྕེས་བསྲེགས་ལ་བསྟོད།
མ་རིག་ལས་ནི་རྣམ་ཤེས་སོགས།
རྟེན་འབྲེལ་ལུགས་འབྱུང་འཆི་བདག་བདུད།
སྒོམ་སྤངས་འཕགས་པའི་ལམ་བརྒྱད་ཀྱིས།
འཆི་མེད་ཞི་བར་སྦྱོར་ལ་བསྟོད།
ཡུལ་དང་ཡུལ་ཅན་འབྲེལ་པ་ལས།
སླུ་བྱེད་འདུ་བྱེད་ལྷ་བུའི་བདུད།
སློབ་པ་མིན་པའི་ཟུང་འཇུག་ཀློང་།
སྒྲོལ་མཛད་ཡིད་བཞིན་འཁོར་ལོར་བསྟོད།
ནོངས་བཤགས་ནི།
མ་འབྱོར་བ་དང་ཉམས་པ་དང་། ། སོགས་ཀྱི་མཐར་ཡིག་བརྒྱས་ནོངས་པ་བཤགས།
གཙོ་བོ་ནུས་པ་མ་མཆིས་པས། །
འདིར་ནི་བགྱི་བ་གང་ནོངས་པ། །
དེ་ཀུན་མགོན་པོས་བཟོད་པར་མཛོད། །
རྗེ་བཙུན་བཅོམ་ལྡན་འདས་མ་སོགས།
རྗེ་བཙུན་བཅོམ་ལྡན་འདས་མ་ཡིས། །
བདག་སོགས་དུས་མིན་འཆི་བ་སྦྱངས། །
འཆི་མེད་ཚེ་དང་ཡེ་ཤེས་ཀྱི། །
བྱིན་རླབས་དངོས་གྲུབ་སྩལ་དུ་གསོལ། །
དགེ་བ་འདི་ཡིས་སྐྱེ་བོ་ཀུན། སོགས་ཀྱིས་བསྔོ་སྨོན་བྱ།
བསོད་ནམས་ཡེ་ཤེས་ཚོགས་རྫོགས་ཤིང༌། །
བསོད་ནམས་ཡེ་ཤེས་ལས་བྱུང་བའི། །
དམ་པ་སྐུ་གཉིས་ཐོབ་པར་ཤོག །
ཐུན་མཚམས་ཐམས་ཅད་དུ་བྱང་ཆུབ་སེམས་ཀྱིས་ཟིན་པའི་བསྐྱེད་རྫོགས་བཟླས་པ་གསུམ་གྱི་ལམ་ཁྱེར་དང་མ་བྲལ་ན། བར་དོར་ཡང་སྒྲོལ་མའི་ཞལ་མཐོང་བ་ཡིན་ནོ།།
ཆོས་མཛད་སཱ་རའི་ངོར་རྒྱལ་བའི་མྱུ་གུ་མཁྱེན་བརྩེའི་ལྷས་སོ།། །།
