འཇམ་དཔལ་དབྱངས་ཀྱི་གསོལ་འདེབས།
༄༅། །འཇམ་དཔལ་དབྱངས་ཀྱི་གསོལ་འདེབས།
ཟབ་གསལ་འགྱུར་མེད་མི་ཤིགས་རྡོ་རྗེའི་སྐུ། །
མཁའ་ཁྱབ་རྡུལ་གཅིག་མ་ལུས་རྗེས་སོང་བ། །
མི་གཡོ་ལྷན་སྐྱེས་རང་བཞིན་འདུས་མ་བྱས། །
འཇམ་དཔལ་ཡེ་ཤེས་སེམས་དཔའ་ཁྱོད་ལ་འདུད། །
བརྗོད་བྲལ་རྨད་བྱུང་གསང་བ་སྟོང་པའི་བདག །
འོད་གསལ་ཡེ་ཤེས་འཕྲོ་བ་སྣང་བའི་དཔྱིད། །
ཁྱབ་བདག་ཕྲ་བའི་ལུས་ཅན་གཞོན་ནུའི་སྐུ། །
སེམས་ཀྱི་རྡོ་རྗེ་ཡེ་ཤེས་སེམས་དཔར་འདུད། །
གང་གི་རང་བཞིན་མཐོང་བ་གཅིག་པུས་ཀྱང༌། །
རྩོལ་མེད་རྫོགས་པའི་ཡོན་ཏན་བབ་ཀྱིས་སྟོབས། །
འབར་བའི་འོད་མཚེར་སྣང་བ་ལམ་མེ་བ། །
རྣལ་འབྱོར་ལམ་གྱི་ཉི་མ་ཁྱོད་ལ་འདུད། །
ཡོན་ཏན་རྫོགས་པའི་རྒྱལ་བའི་ཐུགས་དབུས་སུ། །
སྤྲོས་བྲལ་མཉམ་པ་ཉིད་གནས་འཕོ་འགྱུར་བྲལ། །
ཀུན་མཁྱེན་ཡེ་ཤེས་སྐུ་ཅན་འཇམ་པའི་དབྱངས། །
ཉག་གཅིག་འབྲས་བུའི་མཐར་ཐུག་ཁྱོད་ལ་འདུད། །
ཅེས་པའང་དཔལ་སེང་གེ་རིའི་ཆོས་གྲྭ་ནས་རྣམ་འགྲེལ་གཞུང་ལ་འཆད་ཉན་བགྱིད་སྐབས་ལྷག་པའི་ལྷ་ལ་མི་ཕྱེད་པའི་དད་པ་ཐོབ་ནས་བཙུན་ཆུང་ངག་དབང་དཔལ་བཟང་གིས་ཐོལ་བྱུང་དུ་སྨྲས་པ་དགེའོ།། །།
