Prayer to Invoke Sakya Paṇḍita's Wisdom Mind—Tibetan

༄༅། །འཇམ་མགོན་ས་སྐྱ་པཎྜི་ཏའི་ཐུགས་རྒྱུད་བསྐུལ་བའི་གསོལ་འདེབས་བཞུགས་སོ།།

ཨོཾ་སྭསྟི།

མཐའ་ཡས་སེམས་ཅན་ཚོགས་ལ་ཕན་དགོངས་པའི། །

རབ་འབྱམས་ཕྱོགས་བཅུའི་རྒྱལ་བ་ཐམས་ཅད་དང་། །

ཁྱད་པར་རྒྱལ་སྲས་ཐུ་བོ་འཇམ་པའི་དབྱངས། །

མཚན་ལྡན་བླ་མར་སྣང་ལ་ཕྱག་འཚལ་ལོ། །

དེང་དུས་སྙིགས་མའི་སྐྱོན་གྱིས་སྦགས་པ་ཡིས། །

སྐྱེ་བོ་ཕལ་ཆེར་ཡང་དག་ལམ་ལས་བྱོལ། །

རང་གིས་རང་བསླུས་འདི་ཕྱིའི་དོན་སྟོར་བ། །

འདི་ལས་སྐྱོབས་ཤིག་འཇམ་མགོན་བླ་མ་རྗེ། །

སྣོད་ཀྱི་འབྱུང་བ་མི་བརྟན་འཕེལ་འགྲིབ་ཆེ། །

བཅུད་ཀྱི་སེམས་ཅན་མི་བདེ་སྡུག་བསྔལ་མང་། །

སྣ་ཚོགས་ལས་ཀྱིས་མནར་བའི་འགྲོ་ཁམས་ལ། །

དབུགས་འབྱིན་མཛོད་ཅིག་འཇམ་མགོན་བླ་མ་རྗེ། །

སྔོན་ཆད་ལྗོངས་འདིར་ཆོས་ཀྱི་སྤྱན་ལྡན་པ། །

སྤྲུལ་པའི་ལོ་པཎ་ཆེན་པོ་ཁྱེད་རྣམས་ཀྱིས། །

རྒྱལ་བསྟན་འཁོར་ལོ་གཉིས་ཀྱིས་ལེགས་བསྐྱངས་པས། །

སྐྱེ་དགུ་ཐམས་ཅད་བདེ་དཔལ་འབྱོར་པ་རྒྱས། །

ད་དུས་སྐྱེ་བོ་འཇིག་རྟེན་ཆོས་ཀྱིས་བསླུས། །

བསྟན་པའི་སྒོར་ཞུགས་ཆོས་མིན་བྱ་བས་གཡེང་། །

དེ་ལ་དཀར་ཕྱོགས་ལྷ་ཡི་མགོན་མེད་པས། །

ནད་མཚོན་མུ་གེའི་རྐྱེན་གྱིས་རྣམ་པར་འཐག །

དེ་ཕྱིར་བདག་ཅག་ལྔ་བདོའི་འགྲོ་བ་རྣམས། །

བློ་སྣ་ཡང་དག་ཆོས་ལ་བསྒྱུར་བ་དང་། །

དམ་ཆོས་སྒྲུབ་ལ་བར་ཆད་མི་འབྱུང་ཞིང་། །

རང་གཞན་དོན་གཉིས་འགྲུབ་པར་བྱིན་གྱིས་རློབས། །

ཁྱོད་ཀྱིས་སྔོན་ཚེ་འགྲོ་བ་མགོན་མེད་པ། །

ཀུན་ལ་གཟིགས་པའི་ཞལ་བཞེས་བརྟན་ལགས་ན། །

གདུང་བའི་ཤུགས་ཀྱིས་མ་ལ་བུ་བཞིན་དུ། །

ཡང་ཡང་དྲན་ན་བདག་ལ་ཅིས་མི་དགོངས། །

སྐྱེམས་པ་རྣམས་ཀྱིས་ཆབ་ལ་རེ་བ་བཞིན། །

བདག་ཡིད་རྗེ་བཙུན་བླ་མའི་རྗེས་ཕྱོགས་ཀྱང། །

མགོན་པོ་ཁྱོད་ཀྱི་ཐུགས་རྗེའི་འོད་སྣང་གིས།

བདག་ལ་རེག་པ་མེད་པ་འདི་ཅི་ཞིག །

ད་དུང་དུ་ཡང་བྱང་ཆུབ་སྙིང་པོའི་བར། །

ཆོས་རྗེ་བླ་མ་ཁྱོད་ཀྱི་རྗེས་ཞུགས་པས། །

རབ་འབྱམས་ཤེས་བྱའི་ཆོས་ལ་དབང་འབྱོར་ཞིང། །

བྱང་ཆུབ་སེམས་གཉིས་འབྱོང་བར་མཛད་དུ་གསོལ། །

སྙིགས་མའི་དུས་འདིར་རྒྱལ་བསྟན་རིན་པོ་ཆེ། །

བཤད་སྒྲུབ་འཁོར་ལོ་གཉིས་ཀྱིས་འཛིན་བཟོད་པའི། །

དགེ་འདུན་འདུས་པས་ས་སྟེང་ཀུན་འགེངས་ཤིང་།

མི་ཚེ་ཆོས་ཀྱིས་འདའ་བ་མཛད་དུ་གསོལ། །

འཕགས་པའི་ཡུལ་གྱི་མདོ་སྔགས་གཞུང་ལུགས་ཀུན། །

དངོས་སྟོབས་རིགས་པའི་ལམ་ལས་རབ་དྲངས་ཏེ། །

ཚར་གཅོད་རྗེས་སུ་འཛིན་པའི་ཕྲིན་ལས་ཀྱིས། །

སྐྱེ་དགུའི་བློ་སྣ་ཆོས་ལ་འགྱུར་བར་ཤོག །

ཆོས་སྐྱོང་རྒྱལ་པོའི་ཆབ་སྲིད་ཡུན་དུ་བརྟན། །

བསྟན་འཛིན་སྐྱེས་བུའི་སྐུ་ཚེ་མཛད་ཕྲིན་རྒྱས། །

རྫོགས་ལྡན་དུས་ཀྱི་དགེ་མཚན་གསར་པ་ཡིས། །

བསིལ་ལྡན་ལྗོངས་ཀུན་བདེ་བར་གནས་པར་ཤོག །

བདག་ཀྱང་སྙིགས་མའི་དུས་འདིར་མགོན་ཁྱོད་ཀྱི། །

ཕྲིན་ལས་ཕྱོགས་མཐར་སྤེལ་བའི་བྱེད་པོར་གྱུར། །

འབྲེལ་ཚད་དོན་ལྡན་གཞན་སྣང་དགེ་ལ་བསྒྱུར། །

སངས་རྒྱས་བསྟན་ལ་བྱ་བ་བྱེད་པར་ཤོག། །།

ཅེས་འཇམ་མགོན་ས་སྐྱ་པཎྜི་ཏའི་ཐུགས་རྒྱུད་བསྐུལ་བའི་ཤློ་ཀ་འདི་དག་དཔལ་ལྷུན་གྲུབ་སྟེང་གི་ཆོས་སྡེ་ཆེན་པོར་འཕགས་ཡུལ་མཁས་པའི་ལུགས་ཀྱི་གཞུང་བཤད་གསར་འཛུགས་སྐབས་དགེ་སློང་ཀུན་དགའ་བློ་གྲོས་ཀྱིས་བསྐུལ་བ་བཞིན། །སྤྲང་བན་གཞན་ཕན་སྣང་བས་གསོལ་བ་རྩེ་གཅིག་ཏུ་བཏབ་པ་དགེ་ལེགས་སུ་གྱུར་ཅིག། །།