འཇམ་དབྱངས་མཁྱེན་བརྩེའི་དབང་པོ་ལ་ཕུལ་བའི་བརྟན་བཞུགས་གསོལ་འདེབས།
༄༅། །འཇམ་དབྱངས་མཁྱེན་བརྩེའི་དབང་པོ་ལ་ཕུལ་བའི་བརྟན་བཞུགས་གསོལ་འདེབས།
རྡོ་རྗེ་འཆང་དངོས་རྡོ་རྗེའི་རིག་པ་འཛིན། །
པདྨ་ལས་འཁྲུངས་པདྨའི་རྒྱལ་ཚབ་མཆོག །
འཇམ་དཔལ་དབྱངས་དངོས་འཇམ་དབྱངས་མཁྱེན་བརྩེའི་ལྷ། །
བསྐལ་བརྒྱར་འཚོ་གཞེས་སྐལ་བཟང་མཐོང་གྱུར་ཅིག །
རྒྱལ་ཀུན་རིགས་ཀྱི་བདག་པོ་ཚེ་མཐའ་ཡས། །
རྒྱལ་ཀུན་ཕྲིན་ལས་དབང་བསྒྱུར་རྣམ་རྒྱལ་མ། །
རྒྱལ་ཀུན་བསྐྱེད་ཡུམ་ཡིད་བཞིན་འཁོར་ལོའི་ཞབས། །
ཚེ་ཡི་ལྷ་མཆོག་གསུམ་ལ་གསོལ་བ་འདེབས། །
འཆི་བ་མེད་པའི་ཚེ་ལ་མངའ་བརྙེས་ཤིང་། །
རྒ་བ་མེད་པའི་ལང་ཚོར་རང་དབང་འབྱོར། །
སྐྱེ་འཆི་མེད་པའི་དབྱིངས་དང་རོ་གཅིག་པ། །
འཆི་མེད་ལྷ་མཆོག་གསུམ་གྱི་བདེན་སྟོབས་ཀྱིས། །
དཔལ་ལྡན་བླ་མའི་སྐུ་ཚེ་རབ་བརྟན་ཞིང་། །
སྐུ་ཡི་དཀྱིལ་འཁོར་འབྱུང་བཞིའི་འདུ་འཁྲུགས་མེད། །
གསུང་གི་ཕྲིན་ལས་མཐའ་ཀླས་འགྲོ་བ་འདུལ། །
རྒྱལ་བསྟན་རིན་ཆེན་སྲོག་ཤིང་བརྟན་གྱུར་ཅིག །
ལས་ངན་བདག་ཀྱང་ལུས་ངན་འདོར་བའི་ཚེ། །
གནད་གཅོད་དྲག་པོའི་སྡུག་བསྔལ་མི་འབྱུང་ཞིང་། །
སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །
བདེ་བ་ཅན་གྱི་ཞིང་དེར་སྐྱེ་བར་ཤོག །
ཤུབྷཾ།
