Prayer for Protection—Tibetan
༄༅། །ཆོས་ཉིད་མཁའ་འགྲོའི་གསང་མཛོད་ལས༔ གསོལ་འདེབས་དུས་ངན་འཇིགས་སྐྱོབ་བསམ་པ་མྱུར་འགྲུབ་མ་བཞུགས་སོ༔
ཨེ་མ་ཧོ༔
དུས་གསུམ་རྒྱལ་བ་མ་ལུས་འདུས་པའི་དཔལ༔
སངས་རྒྱས་ཀུན་ལས་ཐུགས་རྗེ་མྱུར་བའི་ལྷ༔
འགྲོ་བའི་སྐྱབས་མགོན་ཨོ་རྒྱན་རིན་པོ་ཆེ༔
ལོག་འདྲེན་ཚར་གཅོད་རྡོ་རྗེ་ཐོད་ཕྲེང་རྩལ༔
གདུག་པ་འདུལ་མཛད་ཡང་ཁྲོས་གྲོ་བོ་ལོད༔
མི་བཟོད་དུས་ཀྱི་གཡུལ་ངོ་འགྱེད་པའི་ཚེ༔
སྐྱབས་དང་རེ་ས་གཞན་ན་མ་མཆིས་པས༔
ཡིད་གཉིས་ཐེ་ཚོམ་མེད་པར་གསོལ་བ་འདེབས༔
མི་མངོན་དབྱིངས་ནས་ཐུགས་ཀྱིས་དགོངས་མཛོད་ལ༔
མཐའ་དམག་དུས་འཁྲུགས་མཚོན་གྱི་བསྐལ་པ་བཟློག༔
ལོ་ཉེས་སད་སེར་མུ་གེའི་འཇིགས་པ་སྐྱོབས༔
མི་ཕྱུགས་ལ་འཚེ་ནད་དང་སྡུག་བསྔལ་སོལ༔
རྒྱལ་བའི་བསྟན་དང་བསྟན་འཛིན་ལ་གནོད་པའི༔
རྒྱ་འདྲེ་འབྱུང་པོ་མི་དང་མི་མིན་གདོན༔
མ་རུངས་བསྟན་ལ་འཚེ་བྱེད་དམ་སྲིའི་རིགས༔
མཁྱེན་བརྩེ་ནུས་པའི་མཐུ་རྩལ་མ་ནན་པར༔
ཐམས་ཅད་བཟློག་ཅིང་བཏུལ་བའི་དུས་ལ་བབས༔
འདི་ཕྱིའི་མི་མཐུན་ཉེར་འཚེ་ཀུན་ཞི་ནས༔
བྱང་ཆུབ་སྒྲུབ་ལ་བར་ཆད་མི་འབྱུང་ཞིང༔
བསམ་དོན་མྱུར་དུ་འགྲུབ་པར་བྱིན་གྱིས་རློབས༔
ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔
རྩེ་གཅིག་འདི་ལ་བརྩོན་གྱུར་ཅིག༔ མི་མཐུན་རྒུད་པ་ཀུན་སེལ་ནས༔ འཇིགས་པ་ཀུན་ལས་སྐྱོབ་པར་ངེས༔
ཐེ་ཚོམ་མེད་དོ་ས་མ་ཡཿ སྐལ་ལྡན་བུ་ ཡི་དཔལ་དུ་སྤྱོད༔ སྐལ་མེད་རྣམས་ལ་གུ་ཧྱ་རྒྱ༔ ས་མ་ཡ་རྒྱ་རྒྱ་རྒྱ༔ ཨྠིྀ༔༔
ཞེས་པ་དད་ལྡན་དཀོན་མཆོག་གིས་ཡང་ཡང་བསྐུལ་ངོར་དུས་མཐའི་གཏེར་མིང་མ་ཀུན་བཟང་བདེ་སྐྱོང་དབང་མོའམ་བདེ་ཆེན་བདེ་བའི་རྡོ་རྗེས་མཁའ་འགྲོའི་གསང་མཛོད་ལས་བསྒྱུར་བ་ཡོངས་སུ་དགེ་བར་གྱུར་ཅིག །
