Gyang Lu—Tibetan

Practices › Calling the Guru from Afar | བོད་ཀྱི་བླ་མ།མཁན་ཆེན་ངག་དབང་དཔལ་བཟང་། | བོད་ཀྱི་བླ་མ།ཀློང་ཆེན་རབ་འབྱམས།

English | Deutsch | བོད་ཡིག

མཁན་ཆེན་ངག་དབང་དཔལ་བཟང་།

ཀློང་ཆེན་རབ་འབྱམས།

Further information:
Download this text:

༄༅། །རྒྱང་གླུ་བཞུགས་སོ།

 

ཕ་རྗེ་བཙུན་བླ་མ་རིན་པོ་ཆེ། །

ཁྱོད་སངས་རྒྱས་ཀུན་དང་དབྱེར་མེད་ཀྱང༌། །

དེང་མོས་པའི་བུ་ལ་ཐུགས་བརྩེ་བས། །

འཕྲལ་རྒྱལ་སྲས་མཆོག་གི་ཚུལ་བཟུང་ནས། །

ལར་བསམ་བཞིན་སྐྱེ་བ་བཞེས་མཛད་པའི། །

རྗེ་རྒྱལ་བའི་དབང་པོ་ཀློང་ཆེན་པ། །

 

ཕ་ཁྱོད་ཀྱི་བྱིན་རླབས་མི་དམན་ཡང༌། །

རྒྱུད་ཉོན་མོངས་དྲག་པོས་ཡོངས་བཟུང་ནས། །

ལས་ནག་པོའི་སྤྱོད་པ་དར་བའི་ཚེ། །

དུས་སྙིགས་མ་ལྔ་བདོའི་སེམས་ཅན་རྣམས། །

འོག་ངན་སོང་གཡང་ས་ཁོ་ནར་ལྷུང༌། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

ལས་སྔར་བྱས་རྣམས་ལ་དོན་མ་མཆིས། །

ཆོས་སྔར་བྱས་རྣམས་ལ་ཆོས་བརྒྱད་འདྲེས། །

ལམ་རྣལ་མ་བསྒྲུབས་པ་གཅིག་མ་དྲན། །

ད་ཁྱེད་རང་མིན་པ་རེ་ས་མེད། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

ལར་གཤིན་རྗེའི་སྐྱེས་བུས་རྒྱབ་ནས་དེད། །

དུས་ལོ་ཟླ་ཞག་གི་མདུན་ནས་བསུས། །

འཕྲལ་རྣམ་གཡེང་བྱ་བས་བར་ནས་བྲིད། །

དེ་མ་ཚོར་བསླུས་ཤིག་བྱུང་ཉན་གདའ། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

གཞོན་དབང་པོ་གསལ་ཚེ་བྱིས་པའི་སེམས། །

ལུས་དར་ལ་བབ་ཚེ་བྲེལ་བས་གཡེང༌། །

ད་རྒས་ཤིང་འཁོགས་པར་གྱུར་པའི་ཚེ། །

ཆོས་གཤའ་མ་དྲན་ཀྱང་ཕྱིས་ནས་སོང༌། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

རང་སྡོད་པར་འདོད་ཀྱང་སྡོད་དབང་མེད། །

ནོར་ཁྱེར་བར་འདོད་ཀྱང་ཁྱེར་མི་བཏུབ། །

གྲོགས་འགྲོགས་པར་འདོད་ཀྱང་རང་གཅིག་པུ། །

སང་འཇིག་རྟེན་ཕ་རོལ་འགྲོ་བར་ངེས། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

ཚེ་འདི་ཡི་བག་ཆགས་འཕེན་པའི་མཐུས། །

ལམ་བར་དོའི་འཕྲང་ལ་ཅི་འདྲ་ཨང༌། །

དཔེ་མདང་སུམ་ཉལ་བའི་རྨི་ལམ་བཞིན། །

ལར་རང་དབང་ཐོབ་པ་ཤིན་ཏུ་དཀའ། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

སྤྱིར་འཁོར་བའི་ཆོས་ལ་སྙིང་པོ་མེད། །

སྒོས་མི་རྟག་ལུས་ལ་སྙིང་པོ་མེད། །

འདི་ནམ་མཁར་ཤར་བའི་འཇའ་ཚོན་འདྲ། །

དེ་བདེན་པར་བཟུང་ཡང་ཡལ་ནས་འགྲོ། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

ཡར་སངས་རྒྱས་རྣམས་ལ་དད་པ་མེད། །

མར་སེམས་ཅན་རྣམས་ལ་སྙིང་རྗེ་ཆུང༌། །

གོས་ངུར་སྨྲིག་གྱོན་ཀྱང་གཟུགས་བརྙན་ཙམ། །

སྐྲ་སྤུ་གྲིས་གཞར་ཡང་དོན་སྒོ་ཆུང༌། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

ཆོས་ཐོས་པ་མང་ཡང་གནད་མ་ཁྲོལ། །

ཁ་བཤད་པ་ཚོ་ཡང་རྒྱུད་མ་དུལ། །

གནས་རི་ཁྲོད་འགྲིམ་ཡང་ཁྱིམ་ལ་སྲེད། །

མིག་ལྟ་སྟངས་བྱས་ཀྱང་ཉམས་མྱོང་མེད། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

མི་གཞན་གྱི་སྐྱོན་མཚང་ཆུང་ངུ་རིག །

རང་ཁོང་ནས་རུལ་བ་ཡེ་མ་ཚོར། །

མི་གཞན་གྱི་མགོ་བོ་བསྐོར་བསྐོར་ནས། །

སྡུག་རང་གི་ཉོས་པ་མ་ལགས་སམ། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

ཁོང་རྒྱལ་བའི་གསུང་རབ་མ་ལུས་ཀུན། །

སེམས་རྒྱུད་ལ་ཨེ་ཕན་མི་སེམས་པར། །

ཁེ་གྲགས་པ་སྒྲུབ་ཕྱིར་ཐོས་བསམ་བྱས། །

དེ་ཐར་པའི་ལམ་དུ་ཨེ་འགྲོ་ཨང༌། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

ང་ཆོས་པའི་ཚུལ་གྱིས་འཇིག་རྟེན་སྒྲུབ། །

ལར་སྐྱེ་བོ་ཀུན་གྱི་མཆོད་པ་ལེན། །

ཚེ་ཡང་ཡེང་བྱ་བའི་ངང་དུ་བཏང༌། །

དབུགས་ཁྲོག་གེར་འགྲོ་དུས་ཅི་འདྲ་ཨང༌། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

བདག་དེ་སླད་སྐྱོ་བ་གཏིང་ནས་སྐྱེས། །

ཡར་སངས་རྒྱས་རྣམས་ལ་གསོལ་བ་འདེབས། །

སྤྱིར་སྙིགས་མའི་དུས་ཀྱི་སེམས་ཅན་དང༌། །

སྒོས་ཆོས་གཟུགས་ཚུལ་ཅན་བདག་སོགས་ལ། །

ཕ་ཐུགས་རྗེས་གཟིགས་ཤིག་ཀློང་ཆེན་པ། །

 

བུ་ང་ལ་རེ་ས་གཞན་ན་མེད། །

བྱ་བྲལ་གྱི་སྐྱིད་སྡུག་ཁྱེད་རང་ཤེས། །

དབྱིངས་ཟག་མེད་བདེ་ཆེན་ཕོ་བྲང་ནས། །

མགོན་ཁྱེད་དང་དབྱེར་མེད་རོ་གཅིག་ཤོག །

 

ཅེས་གླུ་དོན་ལ་སེམས་ཞིང༌། གླུ་དལ་མོས་ལེན་ན་བླ་མའི་བྱིན་རླབས་བཙན་ཐབས་སུ་འཇུག་པ་ཡིན་ནོ། །

 

འདི་མཁན་པོ་ངག་ཆུང་རིན་པོ་ཆེས་མཛད་པའི་ཐུགས་དམ་ནར་མ་ལས་ཁོལ་དུ་ཕྱུང་བའོ།། །།

 

This website uses cookies to collect anonymous usage statistics and enhance the user experience.
Decline
Accept