བླ་མའི་ཐུགས་སྒྲུབ་བར་ཆད་ཀུན་སེལ་ལས་དོན་ཀུན་མྱུར་དུ་འགྲུབ་པའི་སྒྲོལ་མའི་བསྒོམ་བཟླས།
༁ྃ༔ བླ་མའི་ཐུགས་སྒྲུབ་བར་ཆད་ཀུན་སེལ་ལས་དོན་ཀུན་མྱུར་དུ་འགྲུབ་པའི་སྒྲོལ་མའི་བསྒོམ་བཟླས་བཞུགས་སོ། །
ན་མོ༔ བླ་མ་ཡི་དམ་རྗེ་བཙུན་མ༔
མཆོག་གསུམ་རྒྱལ་བ་རྒྱ་མཚོ་ལ༔
བདག་སོགས་འགྲོ་ཀུན་བྱང་ཆུབ་བར༔
རྩེ་གཅིག་གུས་པས་སྐྱབས་སུ་མཆི༔
བྱང་ཆུབ་སེམས་གཉིས་ལྡན་པ་ལ༔
བར་ཆད་ཀུན་གྱིས་ཉེ་མི་ནུས༔
དེ་ཕྱིར་སྐྱབས་ཡུལ་དཔང་བྱས་ཏེ༔
སྨོན་དང་འཇུག་པའི་བྱང་སེམས་བསྐྱེད༔
ཧོ༔ མ་གྱུར་སེམས་ཅན་ཐམས་ཅད་ཀུན༔
སངས་རྒྱས་གོ་འཕང་ཐོབ་བྱའི་ཕྱིར༔
ཉེས་སྤྱོད་ཀུན་བསྡོམ་དགེ་ཆོས་སྡུད༔
རང་གཞན་དོན་གཉིས་མཐར་ཕྱིན་ཕྱིར༔
རྗེ་བཙུན་འཕགས་མའི་རྣལ་འབྱོར་ལ༔
བརྟེན་ནས་འཆི་མེད་བསྒྲུབ་པར་བྱ༔
ཨཿ སྟོང་གསལ་རང་རིག་གཉུག་མའི་དབྱིངས༔
ཡེ་ཤེས་རོལ་པའི་སྣང་ཆ་ལས༔
པད་དཀར་ཟླ་བ་རྒྱས་པའི་སྟེང་༔
ཏཱྃ་ཡིག་ལྗང་སེར་འོད་ཟེར་གྱིས༔
འཕགས་མཆོད་འགྲོ་ཀུན་བར་ཆད་བསལ༔
ཚུར་འདུས་སྐད་ཅིག་དྲན་རྫོགས་སུ༔
རྡོ་རྗེ་བསྲུང་བའི་གུར་ཆེན་དབུས༔
དོན་འགྲུབ་སྒྲོལ་མ་ལྗང་སེར་མདོག༔
ཞལ་གཅིག་ཕྱག་གཉིས་ཞི་ཞིང་འཛུམ༔
ཕྱག་གཡས་མཆོག་སྦྱིན་ཕྱག་རྒྱ་མཛད༔
གཡོན་པས་སྐྱབས་སྦྱིན་ཨུཏྤལ་ལ༔
ཟེའུ་འབྲུའི་སྟེང་དུ་དཔལ་བེའུ༔
ཉི་མ་འཆར་ཀའི་འོད་ཟེར་འཕྲོ༔
དར་དང་རིན་ཆེན་རྒྱན་གྱིས་སྤྲས༔
ཟླ་བའི་རྒྱབ་ཡོལ་ལ་བརྟེན་ནས༔
སྣང་སྟོང་འོད་ལྔ་འཁྲིགས་པའི་ཀློང་༔
ཞབས་གཉིས་ཕྱེད་སྐྱིལ་རོལ་པས་བཞུགས༔
སྐུ་ལས་རང་འདྲའི་རྗེ་བཙུན་མ༔
ནམ་མཁའ་གང་བར་རབ་སྤྲོ་བས༔
འགྲོ་རྣམས་གནས་སྐབས་མཐར་ཐུག་གི༔
འཇིགས་པ་ཀུན་ལས་སྐྱོབས་མཛད་པའི༔
གནས་གསུམ་རྡོ་རྗེ་འབྲུ་གསུམ་མཚན༔
རང་འདྲའི་ཡེ་ཤེས་སྤྱན་དྲངས་བསམ༔
ཏཱྃ༔ སྐྱེ་མེད་འོད་གསལ་ཆོས་སྐུའི་དབྱིངས༔
འགགས་མེད་འཕགས་མའི་ཡེ་ཤེས་སྐུར༔
གང་འདུལ་སྒྱུ་འཕྲུལ་དྲ་བར་ཤར༔
ཚུར་གཤེགས་ཨཱརྻ་ཏཱ་རེ་ཛཿ
ཛཿཧཱུྃ་བཾ་ཧོཿ
ནམ་མཁའ་གང་བའི་དབང་གི་ལྷས༔
དབང་བསྐུར་སྣང་མཐས་དབུ་རྒྱན་བསམ༔
ཨོཾ་ཨཱརྻ་ཏཱ་རེ་ས་པ་རི་ཝཱ་ར་ཨརྒྷཾ་པཱདྱཱཾ་པུཥྤེ་དྷུ་པེ་ཨ་ལོ་ཀེ་གནྡྷེ་ནཻ་ཝི་དྱ་ཤཔྡ་པྲ་ཏཱིཙྪ་སྭཱ་ཧཱ།
ཨོཾ་སྣང་བ་མཐའ་ཡས་པདྨའི་རིགས༔
འཇིག་རྟེན་དབང་ཕྱུག་ཞལ་ལས་བྱུང་༔
སངས་རྒྱས་ཀུན་གྱི་ཕྲིན་ལས་བདག༔
འཕགས་མ་སྒྲོལ་མར་ཕྱག་འཚལ་བསྟོད༔
བདག་ཅག་འཁོར་དང་བཅས་རྣམས་ཀྱི༔
འཇིགས་པ་བརྒྱད་དང་བཅུ་དྲུག་སོགས༔
མི་མཐུན་ཕྱོགས་ཀུན་ཞི་བ་དང་༔
དོན་རྣམས་ཐམས་ཅད་མྱུར་འགྲུབ་གསོལ༔
ཐུགས་ཀར་པདྨ་ཟླ་བའི་སྟེང་༔
ཏཱྃ་ཡིག་ལྗང་སེར་མཐའ་བསྐོར་དུ༔
རྡོ་རྗེ་ཡི་གེ་རྣམས་ཀྱིས་བསྐོར༔
བཟླས་པས་སྔགས་རྣམས་སྒྲར་བཅས་འཁོར༔
འོད་ཟེར་དཔག་ཡས་ཕྱོགས་བཅུར་འཕྲོས༔
འཕགས་མཆོད་བྱིན་རླབས་རང་ལ་ཐིམ༔
འགྲོ་ཀུན་འཇིགས་པ་ཀུན་བསལ་ཞིང་༔
ཁྱད་པར་དཔལ་བེའུ་འོད་ཟེར་གྱིས༔
དོན་རྣམས་ཐམས་ཅད་སྒྲུབ་པར་བསམ༔
དེ་ཡང་འོད་ཟེར་ཕོག་པ་ཙམ་གྱིས་ལྷ་འདྲེ་མི་གསུམ་གྱི་ཡིད་བསྒྱུར་ནས་བདག་གི་བསམ་པ་དང་མཐུན་པའི་དོན་ཐམས་ཅད་འགྲུབ་པར་བསམ་ལ།
ཨོཾ་ཏཱ་རེ་ཏུཏྟ་རེ་ཏུ་རེ་སརྦ་ཨརྠ་སིདྡྷི་སིདྡྷི་ཀུ་རུ་སྭཱ་ཧཱ༔
ཞེས་བཟླས་ཐུན་བསྡུ་ན།
ཧཱུཾ་ཧཱུཾ་ཧཱུཾ༔ སྣོད་བཅུད་ལྷར་གསལ་བ་རང་ལ་ཐིམ།
རང་ཡང་ཐུགས་ཀའི་ས་བོན་ལ་ཐིམ།
དེ་ཡང་མི་དམིགས་པ་འོད་གསལ་གྱི་ངང་དུ་མཉམ་པར་བཞག །
ཕཊ་ཕཊ་ཕཊཿ༔ སླར་ཡང་ཆུ་ལས་ཉ་ལྡང་བའི་ཚུལ་གྱིས་རང་ཉིད་རྗེ་བཙུན་སྒྲོལ་མའི་སྐུར་གསལ་བའི་སྤྱི་བོར་ཨཾ། མགྲིན་པར་ཨཱཿཐུགས་ཀར་ཧཱུཾ་ཡིག་གིས་མཚན་པར་གྱུར།
ཨོཾ་ཨཱཿཧཱུྃ༔ བཛྲཀཱ་ཝཱ་ཙི་རཀྵ་ཧཾ༔
ཧོཿ རྗེ་བཙུན་འཕགས་མ་སྒྲོལ་མ་བསྒྲུབས་པའི་མཐུས༔
བདག་དང་མཐའ་ཡས་སེམས་ཅན་མ་ལུས་ཀུན༔
ཕྲིན་ལས་རྣམ་བཞི་ལྷུན་གྱིས་འགྲུབ་པ་དང་༔
འོད་གསལ་ཆོས་སྐུའི་དབྱིངས་སུ་གྲོལ་བར་ཤོག༔
རྩ་བརྒྱུད་བླ་མའི་བྱིན་རླབས་སྙིང་ལ་ཞུགས༔
ཡི་དམ་མཁའ་འགྲོ་ལུས་དང་གྲིབ་བཞིན་འགྲོགས༔
ཆོས་སྐྱོང་སྲུང་མས་བར་ཆད་ཀུན་བསལ་ནས༔
མཆོག་ཐུན་དངོས་གྲུབ་འགྲུབ་པའི་བཀྲ་ཤིས་ཤོག༔
གཞན་ཡང་སཙྪ། ཆུ་གཏོར། མནྜལ། གཏོར་མ། མེ་མཆོད་སོགས་གཞུང་ནས་གསུངས་པའི་ལས་སྦྱོར་རྣམས་བྱས་ནས་མེ་ལ་ཤིང་བསྣན་པ་ལྟར་སྟོབས་ཆེ་ཞིང་དོན་ཅི་ཡིན་ཡང་མྱུར་དུ་འགྲུབ་པའོ། །
ཞེས་པ་འདི་ནི་ལྷ་ལྕམ་བདེ་ཆེན་ཆོས་སྒྲོན་སོགས་དོན་གཉེར་རྣམས་ཀྱི་ངོར་མཆོག་གྱུར་གླིང་པས་གཏེར་གཞུང་ལས་ཁོལ་དུ་ཕྱུངས་ནས་སྲིད་ཞིའི་འདོད་དགུ་མྱུར་དུ་འགྲུབ་པའི་གླིང་དཔལ་གྱི་ལྷ་སར་ལྷའི་བླ་མ་རྒྱལ་སར་ཕེབས་པའི་ཉིན་སྦྱར་བའོ། །
