Zabtik Drolchok—Tibetan

Tārā | Termas | Tibetan MastersChokgyur Dechen Lingpa | Tibetan Mastersའཇམ་མགོན་ཀོང་སྤྲུལ་བློ་གྲོས་མཐའ་ཡས།

English | བོད་ཡིག

Chokgyur Dechen Lingpa

Green Tārā

Further Information:

༄༅། །དགོངས་གཏེར་སྒྲོལ་མའི་ཟབ་ཏིག་ལས། ཕྱི་སྒྲུབ་རྒྱས་པའི་ཆོ་ག་ཚོགས་གཉིས་སྙིང་པོ་ཞེས་བྱ་བ་བཞུགས་སོ།

ན་མོ་གུ་རུ་ཨཱརྻ་ཏཱ་རཱ་ཡཻ།

དུས་གསུམ་འདྲེན་པ་སྲས་བཅས་ལས། །

ཐུགས་བསྐྱེད་ཕྲིན་ལས་ཕུལ་བྱུང་བ། །

ཡུམ་གྱུར་སྒྲོལ་མ་ལ་བཏུད་ནས། །

བྱ་སྤྱོད་དང་མཐུན་ཉམས་ལེན་བཤད། །

དེའང་ཟབ་ཏིག་འདི་ཉམས་ལེན་ཡང་ཟབ་སྙིང་པོ་བསྡུས་པ་ཡིན་པས་སྤྲོས་བཅས་མང་དུ་མི་དགོས་ཀྱང༌། ཆུང་ཟད་སྤྲོས་པ་དང༌། རྒྱུན་ཁྱེར་དུ་བྱ་བ་སྟེ་རྒྱས་བསྡུས་གཉིས་ལས།

དང་པོ་ནི། རྗེ་བཙུན་སྒྲོལ་མའི་སྐུ་བརྙན་བྲིས་འབུར་སོགས་དཀོན་མཆོག་གི་རྟེན་གང་འཛོམ་གྱི་མདུན་དུ། སྟེགས་བུ་གཙང་མར་ཆུ་གཉིས་ཉེར་སྤྱོད། དཀར་ཟླུམ། བསང་ཆུ། མཆོད་པའི་མཎྜལ། འཐོར་ནས་སོགས་འདུ་བྱ། འགྲུབ་ན་ཁྲུས་དང་གཙང་སྦྲའི་ཀུན་སྤྱོད་བྱ་ཞིང། མི་ལྕོགས་ན་ཤ་ཆང་མ་འབགས་པའི་སྔ་དྲོའི་ཆ་ལྟ་བུར་སྲིད་ལས་ངེས་པར་འབྱུང་དང༌བྱང་ཆུབ་སེམས་ཀྱི་ཀུན་སློང་དང་ལྡན་པས་སྐྱབས་སེམས་ནི།

མདུན་གྱི་ནམ་མཁར་རྗེ་བཙུན་མ་མངོན་སུམ་བཞུགས་པར་མོས་ལ།

 

ན་མོ། དཀོན་མཆོག་ཀུན་དངོས་རྗེ་བཙུན་མར། །

བདག་སོགས་འགྲོ་ཀུན་སྐྱབས་སུ་མཆི། །

བྱང་ཆུབ་སྨོན་པའི་སེམས་བསྐྱེད་ནས། །

ཟབ་མོའི་ལམ་ལ་འཇུག་པར་བགྱི། །

ཚོགས་བསགས་པ་ནི།

རྗེ་བཙུན་འཕགས་མ་སྒྲོལ་མ་དང༌། །

ཕྱོགས་བཅུ་དུས་གསུམ་བཞུགས་པ་ཡི། །

རྒྱལ་བ་སྲས་བཅས་ཐམས་ཅད་ལ། །

ཀུན་ནས་དང་བས་ཕྱག་བགྱིའོ། །

མེ་ཏོག་བདུག་སྤོས་མར་མེ་དྲི། །

ཞལ་ཟས་རོལ་མོ་ལ་སོགས་པ། །

དངོས་འབྱོར་ཡིད་ཀྱིས་སྤྲུལ་ནས་འབུལ། །

འཕགས་མའི་ཚོགས་རྣམས་བཞེས་སུ་གསོལ། །

ཐོག་མ་མེད་ནས་ད་ལྟའི་བར། །

མི་དགེ་བཅུ་དང་མཚམས་མེད་ལྔ། །

སེམས་ནི་ཉོན་མོངས་དབང་གྱུར་པའི། །

སྡིག་པ་ཐམས་ཅད་བཤགས་པར་བགྱི། །

ཉན་ཐོས་རང་རྒྱལ་བྱང་ཆུབ་སེམས། །

སོ་སོ་སྐྱེ་བོ་ལ་སོགས་པས། །

དུས་གསུམ་དགེ་བ་ཅི་བསགས་པའི། །

བསོད་ནམས་ལ་ནི་བདག་ཡི་རང༌། །

སེམས་ཅན་རྣམས་ཀྱི་བསམ་པ་དང༌། །

བློ་ཡི་བྱེ་བྲག་ཇི་ལྟ་བར། །

ཆེ་ཆུང་ཐུན་མོང་ཐེག་པ་ཡི། །

ཆོས་ཀྱི་འཁོར་ལོ་བསྐོར་དུ་གསོལ། །

འཁོར་བ་ཇི་སྲིད་མ་སྟོངས་བར། །

མྱ་ངན་མི་འདའ་ཐུགས་རྗེ་ཡིས། །

སྡུག་བསྔལ་རྒྱ་མཚོར་བྱིང་བ་ཡི། །

སེམས་ཅན་རྣམས་ལ་གཟིགས་སུ་གསོལ། །

བདག་གིས་བསོད་ནམས་ཅི་བསགས་པ། །

ཐམས་ཅད་བྱང་ཆུབ་རྒྱུར་གྱུར་ནས། །

རིང་པོར་མི་ཐོག་འགྲོ་བ་ཡི། །

འདྲེན་པའི་དཔལ་དུ་བདག་གྱུར་ཅིག །

དགེ་སློང་མ་དཔལ་མོས་མཛད་པར་གྲགས་སོ།

མཆོད་པ་བྱིན་བརླབ་ནི།

ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ།

ཨོཾ་སྭ་བྷཱ་ཝ་ཤུདྡྷོ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ།

ཞེས་བསང་སྦྱང་།

གནས་ཡུལ་པདྨོ་བཀོད་པའི་ཞིང༌། །

དབྱིབས་དང་རྒྱན་བཀོད་ཚད་མེད་པར། །

ལྷ་རྫས་ཏིང་འཛིན་ལས་གྲུབ་པའི། །

མཆོད་རྫས་བསམ་མི་ཁྱབ་པར་གྱུར། །

ཨོཾ་བཛྲ་ཨརྒྷཾ་པཱདྱཱཾ་པུཥྤེ་དྷུ་པེ་ཨ་ལོ་ཀེ་གནྡྷེ་ནཻ་ཝི་དྱ་ཤཔྡ་ཨཱཿཧཱུྃ།

ཨོཾ་བཛྲ་སྥ་ར་ཎ་ཁཾ།

དེ་ནས་ཐོག་མར་དཀོན་མཆོག་སྤྱི་ལ་ཕྱག་མཆོད་འབུལ་བ་ནི།

ཕྱོགས་བཅུ་དུས་བཞིའི་བླ་མ་རྒྱལ་བ་སྲས་དང་བཅས་པ་ཐམས་ཅད་མདུན་གྱི་ནམ་མཁར་བཛྲ་ས་མཱ་ཛཿ

མ་ལུས་སེམས་ཅན་ཀུན་གྱི་མགོན་གྱུར་ཅིང༌། །

བདུད་སྡེ་དཔུང་བཅས་མི་བཟད་འཇོམས་མཛད་ལྷ། །

དངོས་རྣམས་མ་ལུས་ཇི་བཞིན་མཁྱེན་གྱུར་པའི། །

བཅོམ་ལྡན་འཁོར་བཅས་གནས་འདིར་གཤེགས་སུ་གསོལ། །

པདྨ་ཀ་མ་ལཱ་ཡ་སྟྭཾ།

ཡན་ལག་བདུན་པ་ནི།

ཇི་སྙེད་སུ་དག་ཕྱོགས་བཅུའི་འཇིག་རྟེན་ན། །

དུས་གསུམ་གཤེགས་པ་མི་ཡི་སེང་གེ་ཀུན། །

བདག་གིས་མ་ལུས་དེ་དག་ཐམས་ཅད་ལ། །

ལུས་དང་ངག་ཡིད་དང་བས་ཕྱག་བགྱིའོ། །

བཟང་པོ་སྤྱོད་པའི་སྨོན་ལམ་སྟོབས་དག་གིས། །

རྒྱལ་བ་ཐམས་ཅད་ཡིད་ཀྱིས་མངོན་སུམ་དུ། །

ཞིང་གི་རྡུལ་སྙེད་ལུས་རབ་བཏུད་པ་ཡིས། །

རྒྱལ་བ་ཀུན་ལ་རབ་ཏུ་ཕྱག་འཚལ་ལོ། །

རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །

སངས་རྒྱས་སྲས་ཀྱི་དབུས་ན་བཞུགས་པ་དག །

དེ་ལྟར་ཆོས་ཀྱི་དབྱིངས་རྣམས་མ་ལུས་པ། །

ཐམས་ཅད་རྒྱལ་བ་དག་གིས་གང་བར་མོས། །

དེ་དག་བསྔགས་པ་མི་ཟད་རྒྱ་མཚོ་རྣམས། །

དབྱངས་ཀྱི་ཡན་ལག་རྒྱ་མཚོའི་སྒྲ་ཀུན་གྱིས། །

རྒྱལ་བ་ཀུན་གྱི་ཡོན་ཏན་རབ་བརྗོད་ཅིང་། །

བདེ་བར་གཤེགས་པ་ཐམས་ཅད་བདག་གིས་བསྟོད། །

མེ་ཏོག་དམ་པ་ཕྲེང་བ་དམ་པ་དང་། །

སིལ་སྙན་རྣམས་དང་བྱུག་པ་གདུགས་མཆོག་དང་། །

མར་མེ་མཆོག་དང་བདུག་སྤོས་དམ་པ་ཡིས། །

རྒྱལ་བ་དེ་དག་ལ་ནི་མཆོད་པར་བགྱི། །

ན་བཟའ་དམ་པ་རྣམས་དང་དྲི་མཆོག་དང་། །

ཕྱེ་མ་ཕུར་མ་རི་རབ་མཉམ་པ་དང་། །

བཀོད་པ་ཁྱད་པར་འཕགས་པའི་མཆོག་ཀུན་གྱིས། །

རྒྱལ་བ་དེ་དག་ལ་ནི་མཆོད་པར་བགྱི། །

མཆོད་པ་གང་རྣམས་བླ་མེད་རྒྱ་ཆེ་བ། །

དེ་དག་རྒྱལ་བ་ཐམས་ཅད་ལ་ཡང་མོས། །

བཟང་པོ་སྤྱོད་ལ་དད་པའི་སྟོབས་དག་གིས། །

རྒྱལ་བ་ཀུན་ལ་ཕྱག་འཚལ་མཆོད་པར་བགྱི། །

འདོད་ཆགས་ཞེ་སྡང་གཏི་མུག་དབང་གིས་ནི། །

ལུས་དང་ངག་དང་དེ་བཞིན་ཡིད་ཀྱིས་ཀྱང་། །

སྡིག་པ་བདག་གིས་བགྱིས་པ་ཅི་མཆིས་པ། །

དེ་དག་ཐམས་ཅད་བདག་གིས་སོ་སོར་བཤགས། །

ཕྱོགས་བཅུའི་རྒྱལ་བ་ཀུན་དང་སངས་རྒྱས་སྲས། །

རང་རྒྱལ་རྣམས་དང་སློབ་དང་མི་སློབ་དང་། །

འགྲོ་བ་ཀུན་གྱི་བསོད་ནམས་གང་ལ་ཡང་། །

དེ་དག་ཀུན་གྱི་རྗེས་སུ་བདག་ཡི་རང་། །

གང་རྣམས་ཕྱོགས་བཅུའི་འཇིག་རྟེན་སྒྲོན་མ་རྣམས། །

བྱང་ཆུབ་རིམ་པར་སངས་རྒྱས་མ་ཆགས་བརྙེས། །

མགོན་པོ་དེ་དག་བདག་གིས་ཐམས་ཅད་ལ། །

འཁོར་ལོ་བླ་ན་མེད་པར་བསྐོར་བར་བསྐུལ། །

མྱ་ངན་འདའ་སྟོན་གང་བཞེད་དེ་དག་ལ། །

འགྲོ་བ་ཀུན་ལ་ཕན་ཞིང་བདེ་བའི་ཕྱིར། །

བསྐལ་པ་ཞིང་གི་རྡུལ་སྙེད་བཞུགས་པར་ཡང་། །

བདག་གིས་ཐལ་མོ་རབ་སྦྱར་གསོལ་བར་བགྱི། །

ཕྱག་འཚལ་བ་དང་མཆོད་ཅིང་བཤགས་པ་དང་། །

རྗེས་སུ་ཡི་རང་བསྐུལ་ཞིང་གསོལ་བ་ཡི། །

དགེ་བ་ཅུང་ཟད་བདག་གིས་ཅི་བསགས་པ། །

ཐམས་ཅད་བདག་གིས་བྱང་ཆུབ་ཕྱིར་བསྔོའོ། །

ཨོཾ་ཨཱཿཧཱུྃ༔ བདག་དང་མཐའ་ཡས་སེམས་ཅན་གྱི༔

ལུས་དང་ལོངས་སྤྱོད་དགེ་ཚོགས་ཀུན༔

གླིང་བཞི་རི་རབ་ཉི་ཟླར་བཅས༔

ལྷ་མིའི་ལོངས་སྤྱོད་བསམ་མི་ཁྱབ༔

ཀུན་བཟང་མཆོད་པའི་སྤྲིན་ཕུང་ཆེ༔

རྒྱུན་མི་འཆད་པར་སྤྲུལ་བྱས་ཏེ༔

དཀོན་མཆོག་རིན་ཆེན་རྩ་བ་གསུམ༔

ཆོས་སྲུང་ནོར་ལྷ་རྒྱ་མཚོ་ལ༔

གུས་པས་རྟག་ཏུ་འབུལ་བར་བགྱི༔

བསོད་ནམས་ཚོགས་ཆེན་རབ་རྫོགས་ནས༔

ཡེ་ཤེས་སྣང་བ་རྒྱས་པར་ཤོག༔

ཨོཾ་གུ་རུ་དེ་ཝ་ཌཱ་ཀི་ནཱི་སརྦ་རཏྣ་མཎྜལ་པཱུ་ཛ་མེ་གྷ་ཨཱཿཧཱུྃ༔

ཞེས་མཎྜལ་ཕུལ།

ན་མོ༔ སངས་རྒྱས་ཆོས་དང་དགེ་འདུན་དང་༔

བླ་མ་ཡི་དམ་མཁའ་འགྲོ་དང་༔

ཆོས་སྲུང་ནོར་ལྷ་གཏེར་གྱི་བདག༔

ཡེ་ཤེས་གཅིག་གི་ངོ་བོ་ལས༔

རང་བཞིན་མ་འགགས་ཅིར་ཡང་སྟོན༔

ཐུགས་རྗེ་ཕྲིན་ལས་རྨད་པོ་ཆེས༔

འགྲོ་ཀུན་སྐྱབས་དང་མགོན་གྱུར་པ༔

མཁྱེན་བརྩེའི་བདག་ཉིད་ཁྱེད་རྣམས་ལ༔

ཕྱག་འཚལ་སྙིང་ནས་སྐྱབས་སུ་མཆི༔

ལུས་དང་ལོངས་སྤྱོད་མཆོད་པར་འབུལ༔

བདག་དང་མཐའ་ཡས་སེམས་ཅན་རྣམས༔

རྟག་ཏུ་ཐུགས་རྗེས་བསྐྱབས་མཛད་གསོལ༔

ནད་དང་གནོད་པ་ཞི་བ་དང་༔

ཚེ་དང་བསོད་ནམས་འཕེལ་བ་དང་༔

བསམ་པའི་དོན་རྣམས་མ་ལུས་ཀུན༔

ཆོས་བཞིན་འགྲུབ་པར་བྱིན་གྱིས་རློབས༔

ཞེས་འདོད་དོན་གསོལ། དེ་ནས་བྱེ་བྲག་རྗེ་བཙུན་སྒྲོལ་མ་ལ་མཆོད་པ་ལན་གསུམ་འབུལ་ཞིང་བསྟོད་པའི་རྒྱུད་འདོན་པ་ནི།

རང་ཉིད་སྐད་ཅིག་དྲན་རྫོགས་སུ༔

རྗེ་བཙུན་འཕགས་མའི་སྐུར་གསལ་བའི༔

ཐུགས་ཀར་ཟླ་སྟེང་ཏཱྃ་ལྗང་གུ༔

དེ་ལས་འོད་ཟེར་དཔག་ཡས་འཕྲོས༔

འཕགས་མ་རྣམ་འཕྲུལ་ཉེར་གཅིག་དང་༔

དཀོན་མཆོག་རྒྱ་མཚོ་སྤྲིན་འཕྲོ་བ༔

མདུན་གྱི་ནམ་མཁར་སྤྱན་དྲངས་གྱུར༔

 

ཏཱྃ༔ སྐྱེ་མེད་འོད་གསལ་ཆོས་སྐུའི་དབྱིངས༔

འགགས་མེད་འཕགས་མའི་ཡེ་ཤེས་སྐུར༔

གང་འདུལ་སྒྱུ་འཕྲུལ་དྲྭ་བར་ཤར༔

ཚུར་གཤེགས་ཨཱརྻ་ཏཱ་རེ་ཛཿ

 

བདག་དང་འགྲོ་ལ་ཐུགས་བརྩེའི་ཕྱིར༔

ཉིད་ཀྱི་རྫུ་འཕྲུལ་མཐུ་ཡིས་ནི༔

ཇི་སྲིད་མཆོད་པ་བདག་བགྱིད་པ༔

དེ་སྲིད་བཅོམ་ལྡན་བཞུགས་སུ་གསོལ༔

པདྨ་ཀ་མ་ལཱ་ཡ་སྟྭཾ༔

ཨོཾ༔ དངོས་འབྱོར་ཡིད་ལས་བྱུང་བ་ཡི༔

ཀུན་ཏུ་བཟང་པོའི་མཆོད་སྤྲིན་གྱིས༔

ཆོས་དབྱིངས་རྒྱས་པར་བཀང་བྱས་ཏེ༔

འཕགས་མ་སྒྲོལ་མ་འཁོར་བཅས་མཆོད༔

ཨོཾ་ཨཱརྻ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ། པཱདྱཱཾ། པུཥྤེ། དྷུ་པེ། ཨ་ལོ་ཀེ། གནྡྷེ། ནཻ་ཝི་དྱ། ཤཔྡ་པྲ་ཏཱིཙྪ་སྭཱ་ཧཱ།

ཞེས་སྤྱན་དྲངས་ཤིང་མཆོད་པ་སྤྱིར་འབུལ།

ཨོཾ་ཨཱཿཧཱུྃ༔ ཁམས་གསུམ་སྣོད་བཅུད་དཔལ་འབྱོར་དང་༔

བདག་ལུས་ལོངས་སྤྱོད་དགེ་ཚོགས་ཀུན༔

ཐུགས་རྗེའི་བདག་ཉིད་རྣམས་ལ་འབུལ༔

བཞེས་ནས་བྱིན་གྱིས་བརླབ་ཏུ་གསོལ༔

ཨོཾ་སརྦ་ཏ་ཐཱ་ག་ཏ་རཏྣ་མཎྜ་ལ་པཱུ་ཛ་ཧོ༔

ཞེས་མཎྜལ་བྱེ་བྲག་ཏུ་ཕུལ་ནས། བསྟོད་པའི་རྒྱལ་པོའི་རྒྱུད། ཨོཾ་རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །ཕྱག་འཚལ་སྒྲོལ་མ་སོགས་ནས། ཕྱག་འཚལ་བ་ནི་ཉི་ཤུ་རྩ་གཅིག བར་ཚར་གཉིས་བརྗོད། ལར་ཡང་། ཨོཾ་དངོས་འབྱོར་ཡིད་ལས་སོགས་མཆོད་པ་དང་། མཎྜལ་གོང་ལྟར་ཕུལ་ནས།

 

ཕྱག་གཡས་མཆོག་སྦྱིན་ཕྱག་རྒྱ་ཉིད༔

སྐྱབས་སྦྱིན་ཕྱག་རྒྱར་གྱུར་པའི་འོག༔

བདག་དང་བསྲུང་བྱ་ཀུན་ཚུད་ནས༔

འཇིགས་པ་ཀུན་ལས་དབུགས་དབྱུང་གྱུར༔

ཅེས་མོས་ལ་ཕྱག་འཚལ་ཉེར་གཅིག་ཚར་གསུམ་བརྗོད། ཡང་མཆོད་པ་དང་མཎྜལ་ཕུལ་ལ།

 

སྐུ་ལས་བདུད་རྩིའི་ཆུ་རྒྱུན་བབས༔

རང་དང་བསྲུང་བྱའི་སྤྱི་བོ་ནས༔

ཞུགས་ཏེ་ལུས་ཀུན་གང་བ་ཡིས༔

བྱིན་རླབས་མ་ལུས་ཞུགས་པར་གྱུར༔

ཅེས་མོས་ལ་ཕྱག་འཚལ་ཉེར་གཅིག་ཚར་བདུན་ཕན་ཡོན་བཅས་བརྗོད།

 

གཏོར་མ་ཨ་མྲྀ་ཏས་བསང་།

ཨོཾ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ།

སྭ་བྷཱ་བས་སྦྱང་།

ཨོཾ་སྭ་བྷཱ་ཝ་ཤུདྡྷོ་སརྦ་དྷརྨ་སྭ་བྷཱ་ཝ་ཤུདྡྷོ྅ཧཾ།

སྟོང་པའི་ངང་ལས་ཨོཾ་ཡིག་ལས༔

རིན་ཆེན་སྣོད་མཆོག་ཡངས་པའི་ནང་༔

འབྲུ་གསུམ་ལས་བྱུང་གཏོར་མ་ནི༔

ཟག་མེད་ཡེ་ཤེས་བདུད་རྩིར་གྱུར༔

ཨོཾ་ཨཱཿཧཱུྃ༔

ལན་གསུམ།

ཨོཾ་ཨཱརྻ་ཏཱ་རེ་ས་པ་རི་བཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི།

ལན་གསུམ་གྱིས་གཙོ་མོ་དང༌།

ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཾ་ཨཱདྱ་ནུཏྤནྣ་ཏོཏྟ་ཨོཾ་ཨཱཿཧཱུྃ་ཕཊ་སྭཱ་ཧཱ།

ལན་གསུམ་གྱིས་མགྲོན་ཐབས་རྣམས་ལ་ཕུལ།

ཨོཾ༔ མཆོད་སྦྱིན་གཏོར་མ་དམ་པ་འདི༔

ཡེ་ཤེས་ཆེན་པོས་རྗེས་དགོངས་ལ༔

བདེ་བ་ཆེན་པོར་བཞེས་ནས་ཀྱང་༔

དངོས་གྲུབ་མ་ལུས་སྩལ་དུ་གསོལ༔

ཞེས་འདོད་དོན་གསོལ༔

ཨོཾ་ཨཱརྻ་ཏཱ་རེ་ས་པ་རི་ཝཱ་ར་བཛྲ་ཨརྒྷཾ། པཱདྱཱཾ། པུཥྤེ། དྷུ་པེ། ཨ་ལོ་ཀེ། གནྡྷེ། ནཻ་ཝི་དྱ། ཤཔྡ་པྲ་ཏཱིཙྪ་སྭཱ་ཧཱ།

སྔགས་ཙམ་གྱིས་མཆོད།

ཨོཾ༔ སྣང་བ་མཐའ་ཡས་པདྨའི་རིགས༔

འཇིག་རྟེན་དབང་ཕྱུག་ཞལ་ལས་བྱུང་༔

སངས་རྒྱས་ཀུན་གྱི་ཕྲིན་ལས་བདག༔

འཕགས་མ་སྒྲོལ་མར་ཕྱག་འཚལ་བསྟོད༔

བསྟོད་པར་འོས་པ་ཐམས་ཅད་ལ། །

ཞིང་རྡུལ་ཀུན་གྱི་གྲངས་སྙེད་ཀྱིས། །

ལུས་བཏུད་པ་ཡི་རྣམ་ཀུན་ཏུ། །

མཆོག་ཏུ་དད་པས་བསྟོད་པར་བགྱི། །

ཞེས་བསྟོད། ཐལ་མོ་སྦྱར་ལ།

རྗེ་བཙུན་འཕགས་མ་འཁོར་དང་བཅས། །

དམིགས་མེད་ཐུགས་རྗེས་བརྩེར་དགོངས་ལ། །

བདག་གིས་ཇི་ལྟར་གསོལ་བའི་དོན། །

གེགས་མེད་འགྲུབ་པར་བྱིན་གྱིས་རློབས། །

སངས་རྒྱས་བསྟན་པ་དར་ཞིང་རྒྱས། །

བསྟན་འཛིན་ཐུགས་མཐུན་ཞབས་པད་བརྟན། །

ཉེར་འཚེའི་བར་ཆད་ཀུན་ཞི་ཞིང༌། །

བཤད་སྒྲུབ་ཕྲིན་ལས་འཕེལ་བར་མཛོད། །

ནད་མུག་འཁྲུག་རྩོད་ཞི་བ་དང༌། །

ཆོས་ལྡན་དཔལ་འབྱོར་གོང་དུ་འཕེལ། །

ཆོས་སྐྱོང་རྒྱལ་པོའི་མངའ་ཐང་རྒྱས། །

རྒྱལ་ཁམས་མཐའ་དབུས་བདེ་བར་མཛོད། །

འཇིགས་པ་བཅུ་དྲུག་དུས་མིན་འཆི། །

རྨི་ལམ་མཚན་ལྟས་ངན་པ་དང༌། །

འཁོར་བ་ངན་སོང་སྡུག་བསྔལ་སོགས། །

གནས་སྐབས་མཐར་ཐུག་འཇིགས་ལས་སྐྱོབས། །

ཚེ་བསོད་དབང་ཐང་ཉམས་རྟོགས་འཕེལ། །

མི་དགེའི་རྟོག་པ་མི་འབྱུང་ཞིང༌། །

བྱང་ཆུབ་སེམས་གཉིས་རྩོལ་མེད་སྐྱེས། །

བསམ་དོན་ཆོས་བཞིན་འགྲུབ་པར་མཛོད། །

འདི་ནི་བྱང་ཆུབ་སྙིང་པོའི་བར། །

བུ་གཅིག་པོ་ལ་མ་བཞིན་དུ། །

འབྲལ་མེད་ཐུགས་རྗེའི་སྤྱན་གྱིས་གཟིགས། །

ཉིད་དང་དབྱེར་མེད་མཛད་དུ་གསོལ། །

ཅེས་འདོད་པའི་དོན་ལ་གསོལ་བ་ཁྱད་པར་དུ་བཏབ་ཅིང་།

ཐུགས་དམ་བསྐུལ་བས།

མདུན་བསྐྱེད་འོད་ཞུ་རང་ལ་ཐིམ༔

དབྱེར་མེད་ཉིད་དུ་བྱིན་རླབས་པས༔

རང་ཉིད་འཕགས་མ་སྒྲོལ་མའི་སྐུ༔

སྣང་ལ་རང་བཞིན་མེད་པར་གྱུར༔

ཅེས་རང་ཉིད་འཕགས་མའི་གསལ་སྣང་དང་ང་རྒྱལ་ལ་སེམས་བཟུང་སྟེ་ཡི་གེ་བཅུ་པའི་བཟླས་པ་ཅི་འགྲུབ་མཐར།

ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ།

ཡིག་བརྒྱ་དང༌།

ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ། ཀུ་རུ་ཧཱུྂ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ

མ་རྙེད་ཡོངས་སུ་མ་ཚང་དང༌། །

གང་ཡང་ནུས་པ་མ་མཆིས་པ། །

འདིར་ནི་བགྱི་བ་གང་ནོངས་པ། །

དེ་ཀུན་ཁྱོད་ཀྱིས་བཟོད་མཛད་རིགས། །

ཞེས་བརྗོད་ལ་ནོངས་པ་བཤགས།

ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །

རྗེས་སུ་མཐུན་པའི་དངོས་གྲུབ་སྩོལ། །

སངས་རྒྱས་ཡུལ་དུ་གཤེགས་སུ་གསོལ། །

སླར་ཡང་བྱོན་པར་མཛད་དུ་གསོལ། །

བཛྲ་མུཿ

ཞེས་བརྗོད་ལ་མགྲོན་ཐབས་ཀྱི་ལྷ་རྣམས་གཤེགས།

ལྷ་དང་རང་སེམས་དབྱེར་མེད་པ༔

ཆོས་དབྱིངས་གཉུག་མའི་ངང་དུ་བཞག༔

ཅེས་གནས་ལུགས་ཀྱི་ལྟ་བ་བསྐྱང༌།

དགེ་བ་འདི་ཡིས་མྱུར་དུ་བདག །

འཕགས་མ་སྒྲོལ་མ་འགྲུབ་གྱུར་ནས། །

འགྲོ་བ་གཅིག་ཀྱང་མ་ལུས་པ། །

དེ་ཡི་ས་ལ་འགོད་པར་ཤོག །

ཅེས་བསྔོ་སྨོན་བྱ།

ཡིད་བཞིན་ནོར་དང་བུམ་པ་བཟང་པོ་ལྟར། །

བསམ་པའི་དོན་ཀུན་ཐོགས་མེད་སྩོལ་མཛད་པ། །

རྗེ་བཙུན་སྒྲོལ་མ་རྒྱལ་བ་སྲས་བཅས་ཀྱིས། །

མི་འབྲལ་ཐུགས་རྗེས་སྐྱོང་བའི་བཀྲ་ཤིས་ཤོག །

ཅེས་སོགས་ཤིས་པ་བརྗོད་ལ་མེ་ཏོག་འཐོར་རོ། །

འཇམ་མགོན་གུ་ཎས་ཆོག་ཁྲིགས་ལགས་སོ།།

 

• Download this text: EPUB MOBI PDF