འཕོ་བ་མ་བསྒོམས་སངས་རྒྱསཿ

འུྃཿ ཀློང་ཆེན་སྙིང་གི་ཐིག་ལེ་ལས༔ འཕོ་བ་མ་བསྒོམས་སངས་རྒྱས༔

ལྟ་བའི་ཀློང་ལ་ཕྱག་འཚལ་ལོ༔

འོད་གསལ་རྫོགས་པ་ཆེན་པོའི་ལམ༔
ཆོས་སྐུ་གཏད་མེད་རང་གྲོལ་ཏེ༔
བཙན་ས་ཟིན་པའི་གང་ཟག་ནི༔
འཕོ་བྱ་འཕོ་བྱེད་ལས་འདས་ཀྱང་༔
སྤྲོས་ཅན་མྱ་ངན་འདའ་དོན་དུ༔
འཕོ་བ་མ་བསྒོམས་སངས་རྒྱས་བསྟན༔
སྔོན་འགྲོ་སྐྱབས་སེམས་སྤྱི་ལྟར་བྱ༔
བདག་དོན་གཞན་དོན་གང་ལ་ཡང་༔
ཚད་མེད་རྣམ་བཞིས་ཟིན་པ་གཅེས༔
དངོས་གཞི་རང་ལུས་རྣལ་འབྱོར་མ༔
ཕྱི་སྒྲུབ་བླ་མའི་རྣལ་འབྱོར་ལྟར༔

དེ་ཡི་ཁོང་དབུས་རྩ་དབུ་མ༔

སྦོམ་ཕྲ་མདའ་སྨྱུག་ཙམ་པ་ལ༔

སྟོང་སངས་འོད་ཀྱི་སྦུ་གུ་ཅན༔

ཡར་སྣ་ཚངས་བུག་གནས་སུ་ཧར༔

མར་སྣ་ལྟེ་བར་ཟུག་པ་ཡི༔

སྙིང་ཁ་ཚིགས་ཀྱིས་བཅད་པའི་སྟེང་༔

རླུང་གི་ཐིག་ལེ་ལྗང་སྐྱའི་དབུས༔

རིག་པ་ཧྲཱིཿཡིག་དམར་པོར་གསལ༔

སྤྱི་བོའི་ཁྲུ་གང་ཙམ་གྱི་སྟེང་༔

སངས་རྒྱས་སྣང་བ་མཐའ་ཡས་ནི༔

མཚན་དཔེ་རྫོགས་པའི་ཕུང་པོར་གསལ༔

མོས་གུས་དྲག་པོས་གསོལ་བ་གདབ༔
ཤེས་པ་གཞན་དུ་མ་ཡེངས་པར༔
རྩེ་གཅིག་འདུན་པའི་ཞུར་ལ་དྲངས༔
རྐན་གྱི་སྦུབས་ནས་ཧྲཱིཿཧྲཱིཿཞེས༔
ལྔ་ཚར་ཕྲུགས་གཅིག་བརྗོད་པ་དང་༔
ལྷན་ཅིག་སྟོད་གཅུམ་མགོ་བོ་སྒྲིམ༔
དེ་ཚེ་རིག་པ་ཧྲཱིཿདམར་པོ༔
ཤོག་སྐྱ་རླུང་གིས་བཏེག་པ་བཞིན༔
ཡར་ཡར་འགྲོ་བའི་ངང་དེ་ལ༔
ཕཊ྄ཿཅེས་དྲག་པོས་མདའ་ལྟར་འཕངས༔
འོད་དཔག་མེད་པའི་ཐུགས་ཀར་བསྟིམ༔
དེ་ལྟར་ཡང་ཡང་འབད་པ་ཡིས༔
འབྱོངས་རྟགས་ཚངས་བུག་འཕར་བ་དང་༔
མགོ་ན་ཆུ་སེར་ཟིལ་པ་ཕྲུམ༔
འཇག་མ་འདལ་གྱིས་ཚུགས་སོགས་འབྱུང་ཿ

དེ་ཚེ་འོད་དཔག་མེད་པའི་སྐུ༔

འོད་དུ་ཞུ་ནས་རང་ལ་བསྟིམ༔

རྐྱེན་དེས་སྐད་ཅིག་དྲན་རྫོགས་སུ༔

རང་ཡང་ཚེ་དཔག་མེད་དུ་གྱུར༔

ཨ་མ་ར་ཎི་ཚར་བརྒྱ་བརྗོད༔
དགེ་བ་བསྔོ་ཞིང་སྨོན་ལམ་གདབ༔
དེས་ནི་ཚེ་ལ་མི་གནོད་སྟེང་༔
རྟེན་འབྲེལ་བདེན་པས་ཚེ་གེགས་ཞི༔
གསང་སྔགས་ཐབས་ཀྱིས་ཆེ་བའི་ལམ༔
མ་བསྒོམས་སངས་རྒྱས་འཕོ་བའི་གནད༔
སྙིང་དང་མིག་ལས་གཅེས་པར་ཟུངས༔
ས་མ་ཡ༔

གསོལ་འདེབས་ནི༔

ཨེ་མ་ཧོ༔

གནས་རང་སྣང་དོན་གྱི་འོག་མིན་ན༔

ཡིད་དད་བརྒྱའི་འཇའ་གུར་འཁྲིགས་པའི་ཀློང་༔

སྐྱབས་ཀུན་འདུས་རྩ་བའི་བླ་མ་ནི༔

སྐུ་ཐ་མལ་མ་ཡིན་དྭངས་མའི་ལུས༔

དཔལ་སངས་རྒྱས་སྣང་མཐའི་ངོ་བོར་བཞུགས༔

ཡིད་མོས་གུས་གདུང་བས་གསོལ་བ་འདེབས༔

ལམ་འཕོ་བ་འབྱོངས་པར་བྱིན་གྱིས་རློབས༔

གནས་འོག་མིན་འགྲོད་པར་བྱིན་གྱིས་རློབས༔

དབྱིངས་ཆོས་སྐུའི་རྒྱལ་ས་ཟིན་པར་ཤོག༔

ཕཊ྄༔ སྤྲུལ་སྐུ། ཕཊ྄༔ ལོངས་སྐུ། ཕཊ྄༔ ཆོས་སྐུ། ཕཊ྄༔ མི་འགྱུར། ཕཊ྄༔ མངོན་བྱང་།། །།