Essence of Accomplishment—Tibetan

Tārā | Tsok | Tibetan Mastersའཇམ་དབྱངས་མཁྱེན་བརྩེའི་དབང་པོ།

English | བོད་ཡིག

འཇམ་དབྱངས་མཁྱེན་བརྩེའི་དབང་པོ།

Green Tārā

Further Information:
Download this text:

༄༅། །འཕགས་མ་སྒྲོལ་མའི་ཚོགས་མཆོད་ཤིན་ཏུ་བསྡུས་པ་དངོས་གྲུབ་སྙིང་པོ་བཞུགས།

 

ན་མོ་གུ་རུ་ཨཱ་རྻ་ཏཱ་རཱ་ཡཻ།

རྗེ་བཙུན་སྒྲོལ་མའི་ལྷ་ལ་ཚོགས་མཆོད་འབུལ་བར་འདོད་ན་བདག་གི་རྣལ་འབྱོར་སྔོན་དུ་འགྲོ་བས། ཐབས་ཤེས་ཀྱི་དམ་རྫས་གཙོ་བོར་གྱུར་པའི་ཚོགས་ཀྱི་ཡོ་བྱད་རྣམས་བསང་ཆུ་དང་བདུད་རྩིས་བྲན་ལ།

རཾ་ཡཾ་ཁཾ།

ཡེ་ཤེས་རིག་རྩལ་མེ་རླུང་ཆུས། །

ཚོགས་རྫས་དངོས་འཛིན་བསྲེག་གཏོར་སྦྱངས། །

བྷནྡྷའི་སྣོད་དུ་བདུད་རྩིའི་བཅུད། །

འདོད་ཡོན་རྒྱ་མཚོའི་ཕུང་པོར་གྱུར། །

ཨོཾ་ཨཱཿཧཱུྂ།

ཧྲཱིཿ འོག་མིན་ཆོས་དབྱིངས་ཕོ་བྲང་དང་། །

ལས་རབ་བཀོད་པ་ལོངས་སྐུའི་ཞིང་། །

གནས་གསུམ་སྤྲུལ་པའི་དཀྱིལ་འཁོར་ནས། །

དམ་ཚིག་སྒྲོལ་མ་རྣལ་འབྱོར་མ། །

རྩ་གསུམ་རྒྱ་མཚོའི་འཁོར་དང་བཅས། །

ཚོགས་ཀྱི་འདུ་བར་སྤྱན་འདྲེན་གཤེགས། །

ལོངས་སྤྱོད་རྣམ་པ་ཐམས་ཅད་པའི། །

ཡེ་ཤེས་བདུད་རྩིའི་མཉེས་མཆོད་འབུལ། །

སྡིག་སྒྲིབ་ཉེས་ལྟུང་མཐོལ་ཞིང་བཤགས། །

གཟུང་འཛིན་རྟོག་ཚོགས་དབྱིངས་སུ་སྒྲོལ། །

མཆོག་ཐུན་ཕྲིན་ལས་དངོས་གྲུབ་སྩོལ། །

ཨོཾ་གུ་རུ་ཨཱ་རྻ་ཏཱ་རེ་ས་པ་རི་ཝཱ་ར་སརྦ་ག་ཎ་ཙཀྲ་པཱུ་ཛ་ཧོཿ

ཞེས་དང་ཡི་གེ་བརྒྱ་པ་བརྗོད།

ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ། ཀུ་རུ་ཧཱུྂ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ

ལྷག་མ་བསྡུད་ཏེ།

ཨོཾ་ཨཱ་ཧཱུཾ་ཧོཿས་བརླབ།

ཕེཾ་ཞེས་པས་མགྲོན་དགུག

དཀྱིལ་འཁོར་ཕྱིར་མྱུལ་དྲེགས་པའི་ཚོགས། །

སྔོན་གྱི་དམ་ཚིག་ཇི་བཞིན་དུ། །

ལྷག་མའི་མཆོད་པ་འབུལ་གྱིས་བཞེས། །

ཨོཾ་ཨུ་ཙིཥྚ་བ་ལིངྟ་ཁཱ་ཧི། །

ཞེས་བསྔོས།

རྗེ་བཙུན་འཕགས་མའི་ལྷ་ཚོགས་ལ། །

རྨད་བྱུང་མཆོད་པ་ཕུལ་བ་ཡིས། །

བསོད་ནམས་ཡེ་ཤེས་ཚོགས་རྫོགས་ནས། །

དངོས་གྲུབ་རྣམ་གཉིས་མྱུར་ཐོབ་ཤོག །

ཅེས་སྨོན་ལམ་གདབ། རྗེས་སུ་མཆོད་བསྟོད། འདོད་གསོལ། ནོངས་བཤགས། ཚོགས་མགྲོན་རྣམས་རྟེན་ཡོད་ན་བརྟན་བཞུགས་དང་། མེད་ན་གཤེགས་གསོལ། བསྔོ་སྨོན། བཀྲ་ཤིས་སོགས་སྤྱི་ལྟར་བྱའོ། །

 

ཞེས་པའང་མཉྫུ་གྷོ་ཥས་བྲིས་པ་དགེ །མངྒ་ལམ།། །།

 

Vajrayāna Buddhism places restrictions on the reading and practice of certain texts, which are intended only for those who have received the requisite empowerments, transmissions and instructions.

If you are unsure as to whether you are entitled to read or practice a particular text please consult a qualified lineage-holder.

OK