འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱི་གསུང་འབུམ་ལས་འཆར།
English | Français | Português | བོད་ཡིག
ལས་འཆར་འདིའི་དམིགས་ཡུལ་ནི་རྫོང་གསར་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ (༡༨༩༣–༡༩༥༩) ཀྱི་གསུང་འབུམ་སྐད་ཡིག་གཞན་དུ་བསྒྱུར་རྒྱུ་དེ་ཡིན། སྤྲུལ་སྐུ་དོན་གྲུབ་རིན་པོ་ཆེའི་ཞལ་ནས། དུས་རབས་ཉི་ཤུ་པའི་ནང་གི་བརྒྱུད་པ་དུ་མ་དང་ལྡན་པའི་བླ་མ་ཆེན་པོ། ཞེས་གསུངས་པ་ལྟར། འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ནི་རིས་མེད་ཆོས་ལུགས་ཀྱི་ཤིང་རྟའི་སྲོལ་འབྱེད་ཆེན་པོ་འཇམ་དབྱངས་མཁྱེན་བརྩེའི་དབང་པོའི (༡༨༢༠–༡༨༩༢) ཕྲིན་ལས་ཀྱི་སྤྲུལ་པར་ཡོངས་སུ་གྲགས་ཤིང། སྐུ་ཕྲེང་གོང་མ་བཞིན་དུ་མདོ་སྔགས་ཀྱི་ཐོས་བསམ་སློབ་གཉེར་མཐིལ་ཕྱིན་པ་ཐོབ་དང་། རིས་མེད་གྲུབ་མཐའ་རྣམས་ལ་ལེགས་སྐྱེས་ཕུལ་དུ་བྱུང་བའི་སྐྱེས་བུ་དམ་པ་ཞིག་ཡིན།
འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱི་གསུང་འབུམ་ཉེ་དུས་ཀྱི་པར་མའི་ནང་། བོད་ཀྱི་རྩོམ་རིག་གི་རྣམ་གྲངས་ཕལ་ཆེ་བ་ཚང་བའི་ཆོས་ཚན་སྟོང་ཕྲག་ལྷག་ཡོད་པ་སྟེ། ལོ་རྒྱུས་དང་རང་རྣམ། སྙན་ངག ཆོ་ག་དང། དེ་བཞིན་མཚན་ཉིད་རིག་པའི་བསྟན་བཅོས་མདོར་བསྟན། གནས་ཡིག། དག་སྣང་བྱུང་ཚུལ་ཞིབ་ཕྲ། རྫོགས་ཆེན་གྱི་མན་ངག ཉམས་མགུར། བློ་སྦྱོང་དོན་བདུན་མའི་འགྲེལ་པ། ཆུ་མོ་གངྒཱའི་གྲུར་བཞུགས་པའི་སྐབས་ལྷ་མོ་དབྱངས་ཅན་མར་བསྟོད་པའི་ཚིགས་བཅད། དགོན་སྡེ་ཁག་གི་བཅའ་ཁྲིམས། བརྟན་བཞུགས། ཉིན་ཐོ། ཆབ་ཤོག་སོགས་དུ་མ་འདུས་ཡོད།
བརྩམས་ཆོས་འདི་དག་ནི་ལོ་རྒྱུས་ཀྱི་ཆ་ནས་དོ་སྣང་བྱེད་འོས་པ་ཞིག་ཡིན་པ་མ་ཟད། ཆོས་བརྒྱུད་དང་སྲོལ་རྒྱུན་གྱི་ཐད་རིན་ཐང་ཅན་གྱི་ངོ་སྤྲོད་སྩལ་ཡོད་པ་དང་། བོད་དང་རྒྱ་གར་ལ་གནས་བསྐོར་ཕེབས་སྐབས་གནས་ཆེན་རྣམས་སུ་མཛད་པའི་གནས་ཡིག་རྣམས་དེ་བས་གལ་འགངས་ཆེན་པོ་ཡིན། ལྷག་པར་གདམས་ངག་སྙིང་བསྡུས་རྣམས་ནི་སྤོང་བ་བསམ་གཏན་པ་ལ་སྒྲུབ་པ་ཉམས་ལེན་གྱི་གདམས་པ་མྱོང་ཁྲིད་དུ་སྩལ་བ་ཞིག་སྟེ། རིན་ཐང་ཧ་ཅང་ཆེན་པོ་ཆགས་ཡོད། དེར་མ་ཟད་བརྩམས་ཆོས་འགའ་ཞིག་གིས་གང་གི་སྐུ་ཚེའི་ལོ་རྒྱུས་ལ་རྒྱུས་ལོན་ཐུབ་པར་ཕན་ཐོགས་བྱུང་ཡོད། དཔེར་ན། རང་རྣམ་ཚིགས་བཅད་མ་དང་གནས་བསྐོར་ཟིན་ཐོ་གཉིས་ཀ་དིལ་མགོ་མཁྱེན་བརྩེ་རིན་པོ་ཆེས་མཛད་པའི་འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱི་མཛད་རྣམ་ཡོངས་འདུས་དགའ་ཚལ་གྱི་ལྷན་ཐབས་ལྟ་བུ་ཆགས་ཡོད། དེ་ནི་༢༠༡༧ ལོར་དབྱིན་ཡིག་ཏུ་པར་སྐྲུན་བྱས་ཡོད།
ཡོང་ཁུངས།
འཇམ་དབྱངས་མཁྱེན་བརྩེ་ཆོས་ཀྱི་བློ་གྲོས་ཀྱི་གསུང་འབུམ་ད་ལྟ་བར་དུ་པར་མ་མི་འདྲ་བ་ཁག་གསུམ་ཡོད་དེ། ༡༩༧༡ ལོར་པར་སྐྲུན་བྱས་པའི་གསུང་ཐོར་བུ་པོད་གཉིས་ཅན་དང་། ༡༩༨༡ ལོར་པར་བསྐྲུན་བྱས་པའི་པོད་བརྒྱད་ཅན། དེ་བཞིན་༢༠༡༢ ལོར་པར་སྐྲུན་བྱས་པའི་པོད་བཅུ་གཉིས་ཅན་བཅས་ཡིན། ༢༠༡༢ ལོ་ནས་བཟུང་ཉུང་མཐར་བརྩམས་ཆོས་ཁ་སྣོན་དྲུག་ཙམ་སོན་ཡོད་པ་རྣམས་མ་འོངས་པར་སྐྲུན་བྱ་རྒྱུའི་ནང་དུ་འཇུག་འཆར་ཡོད།
ལས་རིམ་དང་པོ།
ལས་གཞི་འདི་ནི་ཐོག་མར་མཁྱེན་བརྩེ་ཐེབས་རྩ་ཚོགས་པ་དང་། གཏེར་སྟོན་བསོད་རྒྱལ་གྱི་དགེ་རྩ་ཚོགས་པ་ཟུང་འབྲེལ་ཐོག་ ༢༠༡༩ ལོ་ནས་འགོ་ཚུགས་ཤིང ༢༠༢༣ ལོ་བར་རྒྱུན་འཁྱོངས་བྱས་པ་དང། ལོ་བཞིའི་རིང་ལ་ཡིག་བསྒྱུར་ཆོས་ཚན་ ༥༠༠ ཆ་ཚང་བར་ལེགས་གྲུབ་བྱུང་ཡོད། འདི་ནི་སྔར་བྱུང་མྱོང་མེད་པའི་གྲུབ་འབྲས་ཤིག་རེད།
རིམ་པ་འདིའི་ནང་གི་གལ་ཆེའི་སྒྲ་འགྱུར་ཁག
ལས་རིམ་གཉིས་པ།
གོ་རིམ་གཉིས་པ་དངོས་སུ་འགོ་འཛུགས་སྐབས་འགྲེལ་ཆེན་དང་། རྣམ་ཐར་སོགས་བརྩམས་ཆོས་རིང་གྲས་རྣམས་ལ་དམིགས་ཡོད། དུས་མཚུངས་ང་ཚོས་པར་སྐྲུན་བྱ་རྒྱུར་ལུས་པའི་ཟིན་བྲིས་ཁག་བསྡུ་སྒྲིག་བྱེད་པ་དང་། ལས་རིམ་དང་པོའི་བརྩམས་ཆོས་འགའ་ཤས་ད་དུང་སྒྲ་བསྒྱུར་བྱེད་བཞིན་ཡོད།
ཉེ་ཆར་ཁ་སྣོན་བྱས་པ།
ང་ཚོའི་ལས་འཆར་ལ་རོགས་རམ་གནོངས།
སྒྲ་བསྒྱུར་དང་རྩོམ་སྒྲིག་གི་ལས་གཞིའི་ཆེད་དུ་གཏོང་ཕོད་ཆེ་བའི་ཞལ་འདེབས་གནང་བར་འཚལ།
